Áskeriy bilimlendiriw hám armiyanı sanlastırıw jańa basqıshqa alıp shıǵıladı

Sońǵı jılları dúnyada júz berip atırǵan qurallı kelispewshiliklerde ushıwshısız ushatuǵın apparatlar, robotlastırılǵan sistemalar, radioelektron gúres quralları hám zamanagóy basqarıw texnologiyalarınan keńnen paydalanılmaqta. Bul bolsa tek ǵana qural-jaraq hám áskeriy texnikalardı jańalaw emes, al jańa áwlad qánigelerin tayarlawdı da talap etpekte.

Elimizde bul baǵdarda izbe-iz jumıslar ámelge asırılmaqta. Áskerlerde dronlardı jawıngerlik qollanıw hám olarǵa qarsı gúresiw boyınsha jańa bólimler shólkemlestirilip, ushıwshısız ushatuǵın apparatlardıń operatorları, injenerler hám robototexnika qánigelerin tayarlaw sisteması jolǵa qoyıldı.

Prezentaciyada mámleketimiz basshısına usı mobil bólimlerdiń jumısı hám bul baǵdarda qánigeler tayarlaw sisteması boyınsha esabat berildi.

Áskeriy bilimlendiriw sistemasın reformalaw máselelerine ayrıqsha itibar qaratıldı. 2025-jılı Prezidentimizdiń baslaması menen usı tarawdı rawajlandırıw, zamanagóy bilim hám ámeliy kónlikpelerge iye áskeriy kadrlardı tayarlaw ilajları kórildi. Nátiyjede barlıq joqarı áskeriy bilimlendiriw mákemelerine institut statusı berilip, birden-bir vertikal basqarıw sisteması jaratıldı, Ózbekstan Respublikası Áskeriy qáwipsizlik hám qorǵanıw universiteti shólkemlestirildi.

Zamanagóy jawıngerlik háreketler, áskerlerdegi real talap hám aldınǵı joqarı bilimlendiriw mákemeleriniń tájiriybesi tiykarında jańa mamanlıq talapları, oqıw rejeleri hám baǵdarlamaları engizilmekte. Tayarlıq teoriya hám ámeliyattı úylestiriw principi tiykarında shólkemlestirilip, bolajaq oficerler oqıw procesiniń ózinde áhmiyetli jaǵdaydan kelip shıǵıp xızmet ótewi ushın zárúr kónlikpelerdi iyelewi názerde tutılǵan.

Bakalavr dárejesinde áskeriy kadrlar tayarlawdıń pútkilley jańa modeli sheńberinde kursantlarǵa shet tiller, málimleme texnologiyaları hám jasalma intellekt tereń úyretiledi.

Sárkardalıq-shtab oficerleri ushın aldınǵı sırt el tájiriybesi hám zamanagóy qurallı soqlıǵısıwlardı úyreniw tiykarında birinshi márte úsh basqıshlı jańa oqıtıw sisteması engiziledi.

Sonıń menen birge, serjantlar quramın tayarlaw kólemi de keńeytiledi. Tiykarǵı jańalıqlardan biri – joqarı áskeriy bilimlendiriw mákemelerinde serjantlar ushın bakalavriattıń altı puqaralıq qánigeligi boyınsha aralıqtan bilimlendiriw jolǵa qoyıladı. Sonday-aq, aviaciya hám ushıwshısız ushıw apparatları qánigelerin tayarlaw sisteması jáne de jetilistirilip, bul baǵdarda Qurallı Kúshler áskeriy xızmetkerlerin oqıtıw hám olarǵa birden-bir sertifikat beriw tártibi engiziledi.

Prezentaciyada armiyanı sanlastırıw hám kiberqáwipsizlikti támiyinlew máseleleri de kórip shıǵıldı.
Sońǵı jılları Qorǵanıw ministrligi sistemasında baylanıs infrastrukturası modernizaciyalandı, zamanagóy málimleme-kommunikaciya texnologiyaları engizilmekte, qorǵalǵan maǵlıwmat almasıw kanalları rawajlandırılmaqta.

Áskeriy programmistler tárepinen áskerler jumısınıń túrli baǵdarları boyınsha 50 ge shamalas málimleme sistemaları islep shıǵıldı. Atap aytqanda, qorǵanıw isleri uyımlarında “Shaqırıw” elektron málimleme sisteması jaratılıp, 19 ministrlik hám uyımlar menen integraciya etildi. Bul 39 túrdegi maǵlıwmattı onlayn túrde alıw hám birinshi márte shaqırıw ilajların tolıq elektron túrde ótkeriw imkaniyatın berdi.

Áskeriy medicina tarawında birden-bir medicinalıq málimleme sisteması hám telemedicina engizilip, Densawlıqtı saqlaw ministrliginiń “D-MED” sisteması menen integraciya támiyinlendi.
Zamanagóy qáwip-qáterlerden kelip shıǵıp, Qorǵanıw ministrliginde kiberqáwiplerdi óz waqtında anıqlaw hám olardıń aldın alıwǵa qaratılǵan Málimleme qáwipsizligi monitoring orayı shólkemlestirildi.

Prezentaciyada avtomatlastırılǵan basqarıw sistemaların bunnan bılay da rawajlandırıw, robotlastırılǵan hám avtonom komplekslerden paydalanıwdı keńeytiw, sonday-aq, ilimiy-izertlew hám tájiriybe-konstruktorlıq jumıslardı jolǵa qoyıw boyınsha kompleksli ilajlar usınıs etildi.

Qorǵanıw ministrliginiń oraylıq apparatında Sanlı texnologiyalar bas basqarması, Jasalma intellekt texnologiyaları departamenti hám Kiberqáwipsizlik laboratoriyasın shólkemlestiriw názerde tutılmaqta. Respublikanıń barlıq aymaqlarında úzliksiz hám turaqlı baylanıstı támiyinlew maqsetinde Jasalma joldas baylanıs orayınıń jumısı jolǵa qoyıladı.

Qorǵanıw tarawında birden-bir sanlı siyasattı júrgiziw maqsetinde qorǵanıw ministriniń sanlastırıw, jasalma intellekt hám kiberqáwipsizlik boyınsha orınbasarı lawazımı engizildi.

Áskeriy okruglerde bolsa sárkardalardıń sanlastırıw, jasalma intellekt hám kiberqáwipsizlik boyınsha orınbasarları lawazımların engiziw názerde tutılmaqta.

Prezentaciya juwmaǵında Joqarǵı Bas Sárkarda bildirilgen usınıslardı maqullap, armiyanı jáne de sanlastırıw, áskerlerge zamanagóy málimleme-kommunikaciya sistemaların hám jasalma intellekt texnologiyaların engiziwge qaratılǵan hújjetlerge qol qoydı.

Juwapkerler aldına qorǵanıw tarawın tolıq sanlastırıw, milliy jasalma intellekt modellerin jaratıw hám maman áskeriy kadrlar tayarlaw sistemasın bunnan bılay da jetilistiriw boyınsha tiykarǵı wazıypalar qoyıldı.