Densawlıqtı saqlaw sistemasın bunnan bılay da rawajlandırıw máseleleri dodalandı

Elimizde xalıqqa maman hám zamanagóy medicinalıq xızmet kórsetiw, tarawda basqarıw nátiyjeliligin arttırıw, jeke menshik sektordıń imkaniyatlarınan keńirek paydalanıw jáne aymaqlarda medicina infrastrukturasın jańa basqıshqa alıp shıǵıw boyınsha izbe-iz jumıslar alıp barılmaqta.

Prezentaciyada, bárinen burın, jeke menshik sektordıń tarawdıń rawajlanıwındaǵı ornı hám bul baǵdardaǵı imkaniyatlar kórip shıǵıldı.

Atap ótilgenindey, 2016-jılı elimizde 3,2 mıń jeke menshik klinika jumıs alıp barǵan bolsa, 2026-jılı olardıń sanı 8,7 mıńǵa jetiwi kútilmekte. Jeke menshik medicina baǵdarları 39 dan 116 ǵa, bul sektordaǵı koyka orınları bolsa 16 mıńnan 57 mıńǵa shekem kóbeydi. Jeke menshik sektordıń ulıwma koyka fondındaǵı úlesi 12 procentten 31 procentke shekem artıwı prognoz etilmekte.

Sonıń menen birge, sistemadaǵı ayırım mashqalalar da kórsetip ótildi. Sonıń ishinde, medicinalıq xızmetlerdiń sapası ústinen ámeldegi qadaǵalaw mexanizmleri jeterli dárejede nátiyje bermey atırǵanı, licenziyalaw talapları zaman talaplarına tolıq juwap bermeytuǵını, jeke menshik klinikalardıń jumısı haqqındaǵı maǵlıwmatlardıń birden-bir elektron sistemada qáliplestirilmegeni, sonday-aq, investiciyalıq joybarlar menen mánzilli islesiw sistemasınıń jeterli emes ekenligi atap ótildi.

Sol sebepli, jeke menshik sektordıń qatnasın keńeytiw hám onıń juwapkershiligin arttırıwǵa qaratılǵan jańa kózqaraslar usınıldı.
Atap aytqanda, medicinalıq jumıstı licenziyalawǵa baylanıslı barlıq wazıypalar Medicinalıq shólkemlerdi licenziyalaw hám akkreditaciyalaw orayına ótkerilip, 2026-jıl 1-iyulden licenziyalaw tártiplerin kúsheytiw, nawqastıń qáwipsizligin hám medicinalıq járdem sapasın támiyinlewge baylanıslı 48 túrdegi licenziya talaplarınıń 14 in qayta kórip shıǵıw usınıs etildi. Bul processte kóp tarmaqlı klinikalardıń jumısın tolıq toqtatıw ámeliyatınan waz keship, tek ǵana anıq qaǵıydabuzarlıq anıqlanǵan baǵdar boyınsha sheklew qollanıw tártibi názerde tutılmaqta.

Sonıń menen birge, medicina shólkemleriniń licenziya talapları hám shártlerine ámel etiwi boyınsha sapa qadaǵalawı kúsheytilip, elektron málimleme sistemasında aralıqtan bahalap barıw arqalı qadaǵalaw jolǵa qoyıladı.

Sonday-aq, mámleketlik emes medicina shólkemlerine licenziya sheńberindegi barlıq baǵdarlarda byudjet qarjıları esabınan medicinalıq xızmet kórsetiwge ruqsat beriw, akkreditaciyadan ótken jeke menshik mákemelerge transplantaciya jumısı menen shuǵıllanıw imkaniyatın beriw, 2028-jıldan baslap akkreditaciyadan ótpegen mámleketlik emes hám respublika dárejesindegi mámleketlik medicina mákemeleri menen Qamsızlandırıw qorı tárepinen medicinalıq xızmetlerdiń satıp alıwın ámelge asırmaw usınıs etildi.

2030-jıldıń aqırına shekem barlıq mámleketlik medicina mákemeleri basqıshpa-basqısh, atap aytqanda, 2027-jıl 1-aprelge shekem 55 respublikalıq, 2028-jıldıń aqırına shekem 413 aymaqlıq hám 2030-jıldıń aqırına shekem 3 mıńnan aslam rayon (qala)lıq mámleketlik medicina shólkemleriniń jumısı májbúriy licenziyalanadı.
Jeke menshik medicinanı xoshametlew ushın ekonomikalıq qollap-quwatlaw ilajları da dodalandı.

Sonıń ishinde, alıs aymaqlarda jańa klinikalar ashıw ushın 200 million AQSh dolları muǵdarında jeńilletilgen kredit resursı ajıratılıwı, hár bir joybar ushın 10 jılǵa shekemgi múddetke 10 million AQSh dolları muǵdarında kredit beriw, tiykarǵı stavkanıń 50 procent bólegi ushın kompensaciya mexanizmin qollanıw názerde tutılmaqta. Sonıń menen birge, sırt elli qánigelerge sociallıq salıqtı 1 procent etip belgilew, medicinalıq úskene hám komplektlewshi bólekler boyınsha bajıxana jeńilliklerin beriw sıyaqlı jeńillikler usınıs etildi.

Prezentaciyada tarawǵa investiciyalardı tartıwdıń jańa sisteması da kórip shıǵıldı.
Bunıń ushın Medicina hám farmacevtika tarmaǵın rawajlandırıw agentligin shólkemlestiriw, investorlarǵa konsalting hám ámeliy xızmetlerdi “bir ayna” principi tiykarında kórsetiw, mámleketlik-jeke menshik sheriklik joybarların professionallıq tiykarda qáliplestiriw hám alǵa qoyıw mexanizmin engiziw názerde tutılmaqta.

Atap aytqanda, agentlikke tarawǵa tikkeley investiciyalardı tartıw, investiciyalıq hám mámleketlik-jeke menshik sheriklik joybarlarına járdemlesiw, mámleketlik medicina shólkemlerin basqarıwǵa beriw wákilligi beriledi jáne agentlik shólkemlestiriwinde investiciyalıq joybarlardı qáliplestiriw, kelisiw hám ámelge asırıwda járdemlesetuǵın akcionerlik jámiyeti túrindegi “Health Invest” kompaniyası shólkemlestiriledi.

Sırt elli ekspertler menen birgelikte mámleketlik medicina mákemelerin korporativ basqarıw principleri tiykarında transformaciyalaw strategiyasın islep shıǵıw usınıs etildi. Sonday-aq, sırt elli konsultantlardı tartqan halda medicina shólkemlerin joybarlastırıw, qurıw hám iske qosıwǵa baylanıslı qala qurılısı jáne sanitariyalıq qaǵıydalar menen normalar qayta kórip shıǵılıp, xalıqaralıq talaplarǵa beyimlestiriletuǵını belgilendi.

Mámleketimiz basshısı usınıslardı maqullap, juwapkerlerge tiyisli tapsırmalar berdi.