“Jańa Ózbekstan jasları – 2030” strategiyası ámelge asırıladı

Bul mámleketimizde jaslarǵa baylanıslı qabıl etilip atırǵan birinshi bir pútin strategiya bolıp, Jańa Ózbekstandı qurıwda jaslardıń ornın hám potencialın jáne de tolıq júzege shıǵarıwǵa qaratılǵan.

Búgingi kúnde elimiz xalqı 38 milliondı qurap atırǵan bolsa, sonnan 9,5 millionı yamasa derlik 25 procenti 14-30 jastaǵı jigit-qızlar bolıp esaplanadı. Hár jılı 270 mıń jas shańaraq qáliplespekte. Mine, usı demografiyalıq faktor jaslar siyasatına uzaq múddetli hám sistemalı qatnastı talap etpekte.

Strategiyada jaslardıń bántligin támiyinlew hám isbilermenligin qollap-quwatlaw, sapalı hám inklyuziv bilimlendiriwdi rawajlandırıw, shet tillerin ǵalaba en jaydırıw hám kásiplik bilimlendiriwdi keńeytiw, miynet bazarın xoshametlew hám jas shańaraqlardı qollap-quwatlaw, mádeniy, fizikalıq hám aǵartıwshılıq rawajlanıwdı kúsheytiw, volontyorlıq háreketin keńnen en jaydırıw, jaslardıń salamatlıǵın bekkemlew, sonday-aq, ashıq-aydınlıq hám qatnasıw mexanizmlerin keńeytiw sıyaqlı tiykarǵı baǵdarlar belgilengen.

Prezentaciyada 2030-jılǵa shekem erisiliwi kerek bolǵan tiykarǵı maqsetli kórsetkishler kórip shıǵıldı. Atap aytqanda, hár jılı 600 mıń jastıń bántligin támiyinlew, 2030-jılǵa shekem 900 mıń jastı volontyorlıqqa tartıw, oqıw oraylarınıń sanın 90 mıńǵa jetkeriw, 450 mıń jastıń shet tiller boyınsha bilimin B2 dárejesine alıp shıǵıw, jaslar jınayatshılıǵın azaytıw, hár jılı keminde 10 mıń jas shańaraqtı ipoteka arqalı qollap-quwatlaw sıyaqlı wazıypalar názerde tutılǵan. Bilimlendiriw tarawında jaslardıń sapalı bilim alıwı, mámleketlik emes bilimlendiriw xızmetlerin qollap-quwatlaw, shetki aymaqlarda oqıw oraylarınıń imkaniyatların keńeytiw, shet tillerdi úyreniwdi xoshametlew boyınsha jańa jeńillikler názerde tutılǵan.

Sonıń ishinde, alıs hám shetki aymaqlarda oqıw orayların shólkemlestiriwge 300 million sumǵa shekem ssuda ajıratıw, olar ushın sociallıq salıqtı hám oqıtıwshılardıń dáramat salıǵın 1 procent etip belgilew usınıs etildi. Sonday-aq, B2 dárejesine erisken jaslar ushın sırt el pasportın rásmiylestiriw ushın bajını, C1 dáreje hám isbilermenlik baslamaları ushın ayırım mámleketlik xızmetler tólemlerin 50 procentke shekem azaytıw usınıs etilmekte.

Strategiyada jas shańaraqlardı qollap-quwatlaw máselesine de ayrıqsha itibar qaratılǵan. Ipoteka baǵdarlaması arqalı kredittiń Oraylıq bank stavkasınıń joqarı bólegi qaplap beriliwi, usı tárizde turaq jay máselesinde jas shańaraqlarǵa qosımsha jeńillik jaratılatuǵını belgilenbekte.

Sociallıq belsendilikti arttırıw maqsetinde volontyorlıq qorınan 100 million sumǵa shekem grantlar ajıratıw, belsendi jaslardı mámleketlik shólkemlerde tólemli ámeliyatqa tartıw, aldıńǵı dóretiwshiler ushın Prezident sıylıǵın engiziw, sonday-aq, kitap hám Book-kafeler jaylasqan “Jaslar kósheleri”n shólkemlestiriw rejelestirilgen. Jaslar infrastrukturasınıń minimal standartları belgilenedi, hár bir aymaqtan “jaslar rayon-qalaları” tańlap alınıp, usı standartlardı engiziw boyınsha úlgi jaratıladı.

Jaslardıń salamatlıǵın bekkemlew, ruwxıy qáwip faktorların qısqartıw, psixologiyalıq járdem sistemasın kúsheytiw máseleleri de strategiyada óz kórinisin tapqan. Atap aytqanda, ruwxıy qáwip toparına kiretuǵın jaslardıń úlesin 40 procentke azaytıw, kúni-túni isleytuǵın psixologiyalıq baylanıs orayın shólkemlestiriw, sport penen shuǵıllanatuǵın jaslardıń úlesin 25 procentke arttırıw názerde tutılmaqta.

Jaslar siyasatında ashıq-aydın pikirlesiw hám obektiv tallaw sistemasın kúsheytiw maqsetinde Jaslar mashqalaların úyreniw hám perspektivalı kadrlardı tayarlaw institutı tárepinen jaslardıń talapları hám kútilmeleri boyınsha sociallıq sorawlar ótkerilip, Milliy jaslar indeksi dúziledi. Jigit-qızlardıń múrájatları menen islesiwge ayrıqsha áhmiyet qaratıladı. Hár piyshembi jaslar menen pikirlesiwler ótkerilip barıladı.

Xalıqaralıq birge islesiwdi rawajlandırıw da strategiyanıń áhmiyetli baǵdarlarınan biri sıpatında belgilengen.

Usı maqsette xalıqaralıq forumlar, globallıq baslamalar, áwladlar qarım-qatnası, Xalıqaralıq jaslar kongresi sıyaqlı formatlar jolǵa qoyılıwı, 12-avgust – Xalıqaralıq jaslar kúni sheńberinde iri ilajlar ótkeriliwi, 100 mıń ózbekstanlı jaslardıń xalıqaralıq baǵdarlamalarda qatnasıwın támiyinlew rejelestirilgen. Sonday-aq, BMSh, Jáhán banki, ERTB sıyaqlı strukturalar menen “Junior Professional Officer” baǵdarlaması sheńberinde xalıqaralıq shólkemlerde ámeliyat shólkemlestiriw názerde tutılǵan.

Strategiyanı 2026-2027-jıllarda ámelge asırıw sheńberinde 7 baǵdar boyınsha 56 joybar ámelge asırıladı. Sonıń ishinde, “Jańa áwlad isbilermenleri” baǵdarlamasında Garvard, Stenford, MIT, London biznes mektebi sıyaqlı abıraylı bilimlendiriw mákemeleri menen birgelikte 20 mıń jastı oqıtıw, 1 mıń biznes joybarın tańlap alıw hám olarǵa 3 jılǵa shekemgi múddetke bazalıq esaplaw muǵdarınıń 500 esesine shekem ssuda beriw rejelestirilgen. Jas isbilermenlerge injenerlik tarmaqlarına jalǵanıw qárejetlerin bir bólegin qaplaw tártibi de engiziledi.

Respublika boyınsha “Ózbekstan jaslardı súyedi!” joybarı, “Hayot fest” jaslar festivalı, “Talaba Fest” hám “Talaba Expo 2026” sıyaqlı ilajlar ótkeriledi, Robototexnika associaciyasınıń jumısı qollap-quwatlanadı.

Mámleketimiz basshısı jaslar máselesine baylanıslı barlıq baslama hám ilajlar, bárinen burın, jas áwladtıń bilimli, salamat, intaker hám watansúygish bolıp kamalǵa keliwine, olardıń turmısta múnásip orın iyelewine xızmet etiwi zárúrligin atap ótti. Strategiyanı nátiyjeli ámelge asırıw boyınsha juwapkerlerge tiyisli tapsırmalar berildi.