Áskeriy tayarlıq hám áskeriy xızmetkerlerdi qollap-quwatlaw ilajları belgilendi

Bárinen burın, armiyanıń jawıngerlik tayarlıǵın bekkemlew, jeke quramǵa jańa sistema tiykarında bilim beriw hám kásipke tayarlaw boyınsha ámelge asırılıp atırǵan jumıslar boyınsha esabat berildi.

Atap aytqanda, jawıngerlik tayarlıq baǵdarında áskerlerde kompleksli strategiyalıq hám sárkardalıq shtab oqıwları, jıyın, dala shıǵıwları hám oqıw kursları sistemalı túrde ótkerilip kiyatırǵanı, onda jeke quramda ádep-ikramlılıq-ruwxıy, real jawıngerlik jaǵdaylarda qorqıw hám sezimlerdi basqarıw jáne isenimli háreket ete alıw sıyaqlı áhmiyetli jawıngerlik pazıyletlerdi qáliplestiriwge ayrıqsha itibar qaratılıp atırǵanı atap ótildi.

Zamanagóy jawıngerlik háreketlerdi tallawdan kelip shıǵıp, barlıq oqıw, trening hám shınıǵıwlarda jawıngerlik alıp barıwdıń jańa usıl hám túrleri ózlestirilip atırǵanı, bólimshelerdiń mobilligin, jawıngerlik imkaniyatların hám qoyılǵan wazıypalardı erkin orınlaw qábiletin arttırıwǵa qaratılǵan tiyisli ilajlar kórilip atırǵanı boyınsha málimleme berildi.

Hár jılı elimizde 9-may – Eslew hám qádirlew kúni ulıwmaxalıqlıq bayramı sıpatında belgileniwi elimizde tınıshlıqtı saqlaw, ǵárezsizlikti bekkemlew, Watan azatlıǵı jolında qurban bolǵanlardıń esteligin eslew, búgin aramızda saw-salamat jasap atırǵan urıs hám miynet veteranlarına ǵamqorlıq kórsetiwdiń ayqın ámeliy kórinisi bolıp esaplanadı.

Bıyıl bayram múnásibeti menen Ekinshi jer júzilik urıs qatnasıwshıları hám mayıplarınıń hár birine 30 million sum muǵdarında bir mártelik aqshalay sıylıq tólew usınıs etildi.

Sonday-aq, bul kúnde urıs qatnasıwshıları, front artı miynet veteranları, kekseler hám ustazlarǵa húrmet-izzet kórsetiw, jalǵız baslı hám kem támiyinlengen veteranlardıń turaq jayların abadanlastırıw, túrli eslew hám qádirlew ilajların shólkemlestiriw rejelestirilgen. Ǵárezsizlik jıllarında xızmet wazıypasın orınlaw waqtında qaytıs bolǵan Watan pidayılarınıń esteligi de ulıǵlanadı. Olardıń shańaraq aǵzalarına materiallıq hám ruwxıy járdem kórsetiledi.

Ana Watanımızdıń tınıshlıǵı, xalqımızdıń tatıwlıǵı jolında janın pidá etken áskeriy xızmetkerlerdiń mártligin hám erligin úgit-násiyatlawǵa qaratılǵan ruwxıy-watansúyiwshilik ilajları ótkeriledi. Mámleketimiz boylap “Pursat, mártlik, jigerlilik!” súreni astında mádeniy-aǵartıwshılıq ilajlar, úsh áwlad ushırasıwları, dóretiwshilik kesheler, tańlawlar hám ǵalabalıq sport jarısları shólkemlestiriledi.

Prezentaciyada rezervtegi hám zapastaǵı oficerlerdi tayarlaw sistemasın jańa basqıshqa alıp shıǵıwǵa qaratılǵan qosımsha ilajlar da kórip shıǵıldı. Atap ótilgenindey, dúnyada júz berip atırǵan áskeriy kelispewshiliklerdi tallaw urıs dáwirindegi mobilizaciya talaplarınan kelip shıǵıp, tınıshlıq dáwirinde áskeriy tayarlıqqa iye bolǵan oficerler rezervin qáliplestiriw hám olardı qánigelikler boyınsha durıs bólistiriw áhmiyetli wazıypa ekenin kórsetpekte.

Házirgi kúnde 4 joqarı bilimlendiriw hám 2 joqarı áskeriy bilimlendiriw mákemesiniń áskeriy tayarlıq oqıw orayları hám fakultetlerinde 42 qánigelik boyınsha rezerv hám zapastaǵı oficerler tayarlanbaqta. Buǵan qosımsha túrde Úrgensh, Termiz, Ándijan mámleketlik universitetleri, Samarqand ekonomika hám servis institutı jáne Ándijan mámleketlik medicina institutında jáne 5 áskeriy tayarlıq oqıw orayın shólkemlestiriw usınıs etildi.

Sonday-aq, mámleketlik joqarı bilimlendiriw mákemelerinde qosımsha túrde “Shaqırıwǵa shekemgi áskeriy bilimlendiriw” baǵdarı boyınsha 3 jıllıq bakalavriat bilimlendiriwi tiykarında rezerv hám zapastaǵı oficerlerdi tayarlaw sisteması jolǵa qoyıladı. Áskeriy medicina institutında bolsa birinshi márte klinikalıq ordinatura hám magistraturaǵa qabıl etilgen jáne áskeriy tayarlıqtan ótiw tilegin bildirgen studentler tólemli-kontrakt tiykarında oqıtıladı. Bunday imkaniyat mámleketlik emes joqarı bilimlendiriw mákemeleriniń studentleri ushın da jaratıladı.

Búgingi kúnde áhmiyetli bolǵan jasalma intellekt, dron, robototexnika sıyaqlı zamanagóy hám tar qánigelikler boyınsha da rezerv oficerlerin tayarlaw jolǵa qoyıladı. Áskeriy tayarlıq oqıw bólimleri ushın aldınǵı sırt el armiyalarınıń tájiriybesi tiykarında jańa oqıw reje hám baǵdarlamalar islep shıǵıladı.

Áskeriy xızmetkerlerdi sociallıq qorǵaw máselelerine de ayrıqsha itibar qaratıldı. Usı jılı 13-yanvar kúni Prezidentimiz, Qurallı Kúshlerimiz Joqarǵı Bas Sárkardası basshılıǵında ótkerilgen Qáwipsizlik keńesiniń májilisinde bul másele tiykarǵı wazıypalardan biri sıpatında belgilengen edi.

Sonıń ishinde, Qorǵanıw ministrligi oficerlerine xızmet jılları ushın tólenetuǵın hár aylıq ústeme muǵdarın eki esege arttırıw, kontrakt boyınsha xızmet etip atırǵan ápiwayı ásker hám serjantlardıń aylıq aqshalay támiynatın 10 procentke kóbeytiw usınıs etildi.

Prezidentimiz usınıslardı qollap-quwatlap, olardıń orınlanıwı áskeriy xızmetkerler hám olardıń shańaraq aǵzaların sociallıq qorǵawdı bunnan bılay da kúsheytiwge, áskeriy xızmettiń abırayın hám tartımlılıǵın arttırıwǵa xızmet etetuǵının atap ótti hám tiyisli hújjetlerge qol qoydı.