Imam Buxariy estelik kompleksi – Jańa Ózbekstannıń dúrdanası

Kompleks mámleketimiz basshısınıń baslaması menen ullı muhaddis babamızdıń islam dúnyasında tutqan joqarı abırayı, úlken potencialına múnásip tárizde qaytadan qurıldı. Zıyaratshılarǵa hár tárepleme qolaylı sharayat jaratıldı.

Atap aytqanda, kompleks janında turizm orayı ashıldı. Qaptaldaǵı 15 gektar maydanda zamanagóy infrastruktura jaratılıp, ıqsham miymanxanalar, xızmet kórsetiw hám servis orayları qurıldı. Sonıń ishinde, 1 tórt juldızlı, 2 úsh juldızlı miymanxana, 22 176 orınlıq shańaraqlıq miyman úyleri hám avtomobil turatuǵın orın qurılǵan. Bul obektler tolıq kommunikaciya tarmaqları menen támiyinlenip, aymaǵında abadanlastırıw jumısları ámelge asırılǵan.

Nátiyjede Imam Buxariy kompleksi burın bir kúnde 12 mıń zıyaratshıǵa xızmet kórsetken bolsa, házir kúnine 65 mıń zıyaratshını qabıl etiw quwatlılıǵına iye.

Komplekstiń ózi Samarqandtıń, jańa Ózbekstannıń dúrdanası bolıp boy tikledi. Onıń maydanı 45 gektardı quraydı. 10 mıń adamǵa mólsherlengen úlken meshit, hákimshilik imaratı, 154 baǵanalı milliy usıldaǵı sawlatlı áywan qurıldı.

Kompleks quramında eń aldınǵı málimleme texnologiyaları tiykarında 9 pavilonnan ibarat biybaha innovaciyalıq muzey qurıldı. Ol islam dúnyasında muhaddisler sultanı dep tán alınǵan Imam Buxariydiń ómiri hám ilimiy miyrası, islam aǵartıwshılıǵınıń rawajlanıwına qosqan úlesin kórsetedi. Sonday-aq, muzeyde Quranı kárimde atları tilge alınǵan 25 payǵambar tariyxı, Muhammed áleyhissalamnıń shejiresi, Mekke hám Madinadaǵı turmısı, hádislerdiń jıynawı hám jazılıwı haqqındaǵı maǵlıwmatlar jaylastırılǵan.

Zıyarat etiw ornında 14 kók gúmbez, 75 metrlik 4 minara oǵan ullı kórinis baǵıshlap tur.

Mámleketimiz basshısı turizm orayı hám meshitte jaratılǵan sharayatlardı kózden ótkerdi.

Hámmemizge belgili, bir yarım mıń jıllıq islam tariyxın, ilim-máripatın elimizden jetisip shıqqan ullı ilimpaz hám ulamalardıń atlarısız kóz aldımızǵa keltire almaymız. Usı kúnlerde rásmiy ashılǵan Ózbekstandaǵı Islam civilizaciyası orayı da bul haqıyqattı jáne bir márte tastıyıqlaydı.

Pútkil musılman áleminde hádis ilimi haqqında sóz bolǵanda, álbette, biziń úlkemiz birinshiler qatarında tilge alınadı. Sebebi Imam Buxariy, Imam Termiziy sıyaqlı ullı hádistanıwshı ilimpazlar mine usı jerdiń perzentleri bolıp esaplanadı.

Atap aytqanda, Imam Buxariydiń “Sahihi Buxariy” kitabı dúnyada tán alınǵan eń abıraylı altı hádis kitabınıń biri bolıp esaplanadı. On jas waqtınan baslap hádis ilimin úyrengen ilimpaz babamız 20 dan aslam shıǵarma jazǵan. Olar házirge shekem dinimizdi bekkemlew jolında islam úmmetine xizmet etip kelmekte.

Prezidentimiz hár saparı Samarqandqa kelgeninde komplekstiń qurılıs procesi menen tanısıp, bul jer tek zıyarat etiw emes, ilim-aǵartıwshılıq, tárbiya hám ibrat orayı bolıwı, Imam Buxariydiń ullı izlenisleri, bilimi hám jetikligi zıyaratshılar, ásirese, jaslarǵa úlgi bolıwı kerek ekenin atap ótken edi.

– Bul biytákirar qurılıs jańa Ózbekstannıń keń imkaniyatların ayqın kórsetedi. Zıyarat etiw ornı xalqımız ushın, dúnyadaǵı barlıq musılmanlar ushın jaqsılıq hám aǵartıwshılıq nurın taratatuǵın teberik orınǵa aylanadı, dep isenemen. Bul dárgaydı zıyarat etip, onıń ruwxıy ortalıǵınan paydalanǵan insan, ásirese, jaslar islam dininiń tiykarǵı mánisin túsinip jetedi, durıs joldan adaspaydı, – dedi Prezidentimiz.

Sonıń ushın da Imam Buxariy kompleksinde ruwxıy-aǵartıwshılıq jumıslardı keńnen jolǵa qoyıw, onı haqıyqıy tárbiya hám ibrat mektebine aylandırıw, bul jerde imam-xatibler, máhálle belsendileri ushın tájiriybe arttırıw baǵdarlamaların kúsheytiw zárúr ekenligi atap ótildi.

Bul jerdegi barlıq jumıslar juwmaqlanǵanın esapqa alıp, jańadan qurılǵan sawlatlı meshitte Hayıt namazın oqıw usınıs etildi, bul mómin-musılmanlarımız, pútkil el-xalqımızdıń kewlindegi jumıs, xalqımızǵa múnásip Ramazan sawǵası bolıwı kerek.

Sonıń menen mámleketimiz basshısınıń Samarqand wálayatına saparı juwmaqlandı.