Elimizdiń qorǵanıw qábiletin bekkemlew máseleleri dodalandı

Elimizdiń qorǵanıw potencialın bunnan bılay da bekkemlew, áskeriy qáwipsizligin támiyinlew máseleleri, sonday-aq, usı jıldıń 13-yanvar kúni Qáwipsizlik keńesiniń keńeytilgen májilisinde belgilengen tiykarǵı wazıypalardıń orınlanıw barısı kórip shıǵıldı.

Dúnyada keskinlik hám kelispewshilikler oshaqları saqlanıp qalıp, geosiyasiy báseki kúsheyip, jańa qáwip-qáterler qáwpi artıp atırǵanı atap ótildi. Ayırım regionlardaǵı áskeriy háreketler awır gumanitarlıq hám ekonomikalıq aqıbetlerge alıp kelip atırǵan tınısh emes xalıqaralıq jaǵday sharayatında mámleketimizdiń qorǵanıw qábiletin bekkemlew hám qáwipsizligin támiyinlew ayrıqsha áhmiyetke iye bolmaqta.

Qorǵanıw ministri áskerlerdiń jawıngerlik tayarlıǵın arttırıw, bólim hám bólimshelerdi operativ tayarlaw, olardı zamanagóy qural-jaraq hám texnikalar menen támiyinlew, áskeriy-hákimshilik sektorlar infrastrukturasın rawajlandırıw boyınsha ámelge asırılıp atırǵan jumıslar haqqında málimleme berdi.

Rawajlanǵan mámleketlerdiń aldınǵı tájiriybesin hám jawıngerlik háreketler tájiriybesin úyreniw, áskeriy basqarıw hám tayarlıq sistemasına zamanagóy qatnaslardı engiziwge ayrıqsha itibar qaratıldı. Atap aytqanda, áskerlerdiń nátiyjeliligin arttırıw ushın jańa texnologiyalar, sonıń ishinde, ushıwshısız sistemalar hám sanlı basqarıw sheshimlerin keńnen qollanıw zárúr ekenligi atap ótildi.

Sonday-aq, áskeriy-hákimshilik sektorlar, poligonlar, bilimlendiriw mákemeleri hám materiallıq-texnikalıq támiynat obektleriniń infrastrukturasın zaman talapları tiykarında modernizaciyalaw hám rawajlandırıw boyınsha anıq wazıypalar belgilendi.

Áskeriy kadrlar tayarlaw sistemasın jetilistiriwdi izbe-iz dawam ettiriw, ilimiy-izertlew jumısların kúsheytiw, zamanagóy qural-jaraq hám texnologiyalardı ózlestiriwge qaratılǵan baǵdarlamalardı keńeytiw boyınsha tapsırmalar berildi.

Májilis juwmaǵında mámleketimiz basshısı Qurallı Kúshlerdi bunnan bılay da rawajlandırıw hám elimizdiń qorǵanıw qábiletin bekkemlew boyınsha tiyisli wazıypalardı belgilep berdi.