Paytaxtta urbanizaciya processleri hám jasıl aymaqlardı keńeytiw boyınsha usınıslar tanıstırıldı

Keyingi jıllarda paytaxt ekonomikası hám aglomeraciyası jedel ósip, Tashkent qalasınıń turaqlı xalqı 3,1 millionnan astı. Sonıń menen birge, 2045-jılǵa barıp, qala xalqınıń sanı eki eseden zıyatqa artıwı prognoz etilmekte. Bul bolsa urbanizaciya processlerin turaq jay, transport-logistika, injenerlik tarmaqları hám sociallıq infrastrukturaǵa túsip atırǵan júklemege sáykes túrde rawajlandırıwdı talap etedi.

Sonday-aq, qala ortalıǵın salamatlandırıw hám turmıs sapasın jaqsılaw maqsetinde jasıl aymaqlardı keńeytiw tiykarǵı wazıypa sıpatında belgilengen. Atap aytqanda, Tashkent qalası hám onıń átirapında jasıl zonalar maydanın úsh esege arttırıp, 25 mıń gektarǵa jetkeriw, xalıqtıń jan basına jasıl maydanlardıń kólemin 3 kvadrat metrden 6 kvadrat metrge shekem kóbeytiw maqset etilgen.

Ótken dáwirde intakerler tárepinen qurılıs boyınsha ulıwma maydanı 2 mıń 679 gektar bolǵan 85 joybar usınısı kelip túsken. Prezentaciyada usı joybarlardı kompleksli kórip shıǵıwdıń nátiyjeleri haqqında málimleme berildi.
Úyreniw dawamında hár bir joybardı qala qurılısınıń birden-bir qatnası tiykarında bahalaw, aymaqtıń keminde 30 procentinde jasıl maydanlar shólkemlestiriw imkaniyatı, renovaciya arqalı eskirgen aymaqlardı kompleksli jańalaw hám jer maydanı 1 gektarǵa shekemgi kishi hám tıǵız qurılıslar ámeliyatınan waz keshiw máselelerine ayrıqsha itibar qaratıldı.

Kórip shıǵıw juwmaqlarınan kelip shıǵıp, 18 joybardı ámelge asırıwǵa ruqsat beriw, 12 joybardıń jer maydanı, qabatlar sanı hám joybar koncepciyasına ózgeris kirgizgen halda optimallastırıw usınıs etilgen, 54 joybardı bolsa konceptuallıq jaqtan tolıq qayta kórip shıǵıw zárúr dep tabılǵan.

Yangihayat rayonındaǵı “Jańa áwlad” arnawlı sanaat zonasın keńeytiw rejeleri dodalandı. Sonıń esabınan Tashkent qalasınıń orayınan iri sanaat kárxanaların basqıshpa-basqısh kóshiriw, joqarı qosımsha qun jaratatuǵın hám ekologiyalıq talaplarǵa juwap beretuǵın óndirislerdi jaylastırıw áhmiyetli ekeni atap ótildi.

Maqullanǵan joybarlardı ámelge asırıw nátiyjesinde hár jılı qurılıs esabınan qosımsha 1,5 milliard dollar jalpı aymaqlıq ónim, byudjetke 3,5 trillion sum túsimler qáliplesiwi hám 260 mıń jumıs ornı jaratılıwı kútilmekte.
Prezentaciyada jasıl aymaqlardı keńeytiw máselelerine ayrıqsha itibar qaratıldı.

Joybarlardıń keminde 30 procentinde, yaǵnıy 400 gektarda jasıl maydanlar shólkemlestiriw shárt ekenligi kórsetip ótildi. Bunnan tısqarı, Tashkent qalasınıń 9 aymaǵında ulıwma maydanı 134 gektar bolǵan óz aldına jańa jámiyetlik parklerdi qurıw rejeleri kórip shıǵıldı hám maqullandı.

Joybarlardan óndiriletuǵın infrastruktura tólemlerinen túsken qarjılar, birinshi gezekte, jańa jasıl aymaqlar jaratıwǵa, qalǵan bólegi bolsa qala infrastrukturası obektlerin qurıwǵa jumsalıwı zárúr ekenligi kórsetip ótildi.

Prezidentimiz paytaxttaǵı urbanizaciya processlerin jámiyetshiliktiń mápleri, salamat ortalıq hám ekologiya talapları menen baylanıstırǵan halda rawajlandırıw boyınsha juwapkerlerge kórsetpeler berdi.