Jizzaq wálayatın sociallıq-ekonomikalıq rawajlandırıw rejeleri dodalandı

Ótken jıllarda alıp barılǵan reformalar hám sistemalı ilajlar nátiyjesinde wálayat ekonomikasında strukturalıq transformaciya júz berdi. Nátiyjede aymaq agrar tarawdan diversifikaciyalanǵan sanaat, xızmetler hám zamanagóy agroklasterlerge qánigelestirildi. Toqımashılıq, qurılıs materialları, avtomobil qurılısı, elektrotexnika hám turizm sıyaqlı jańa ósiw drayverleri qáliplesti.

Jalpı aymaqlıq ónimde sanaattıń úlesi 9,1 procentten 18,8 procentke arttı, awıl xojalıǵınıń úlesi 50 procentten 36 procentke azaydı. Sonday-aq, jumıssızlıq hám kámbaǵallıq sáykes túrde 4,9 hám 5,8 procentke azaydı, eksport 1,8 esege, xızmet kórsetiw 1,6, sanaat óndirisiniń kólemi 1,9 esege kóbeydi.
25 iri jáne 533 orta hám kishi investiciyalıq joybarlar iske qosıldı, 1,4 milliard dollar sırt el investiciyası ózlestirildi. Eksport etiwshi kárxanalardıń sanı 160 ǵa jetip, eksport kólemi 285 million dollardı quradı.

Májiliste wálayatta kámbaǵallıq hám jumıssızlıqtı jáne de qısqartıw, sanaat, xızmet kórsetiw hám awıl xojalıǵında keskin ósiwge erisiw boyınsha rejeler kórip shıǵıldı.
Atap aytqanda, 2026-2027-jılları jalpı aymaqlıq ónimniń ósiw pátlerin 8,5 procentke jetkeriw, sanaatta óndiris kólemin 8 procentke arttırıw, 5 milliard dollar sırt el investiciyasın tartıw hám jıllıq eksport kólemin 500 million dollarǵa jetkeriw rejelestirilgen.
Itibarlı tárepi, ótken jılları investiciyalar tiykarınan shiyki zat qazıp alıw yamasa ápiwayı jıynaw óndirisine baǵdarlanǵan bolsa, endi joqarı qosımsha qunǵa iye sanaat joybarlarına baǵdarlanadı.

Bunnan tısqarı, usı jılı wálayatta jumıssızlıq dárejesin 3 procentke, kámbaǵallıqtı 2,8 procentke túsiriw, 182 máhálleni jınayatshılıqtan jıraq aymaqqa aylandırıw názerde tutılǵan.
Mámleketimiz basshısı bul maqsetlerge wálayattaǵı máhállelerdi tereń qánigelestirmey turıp erisiwge bolmaytuǵının atap ótti.
Usı múnásibet penen wálayatta kelesi eki jılda jańa model rawajlandırıladı. Aymaqtaǵı 304 máhálleniń salıstırmalı ústinlikleri tallanıp, olardıń baǵshılıq, sharwashılıq, ovoщ hám palız jetistiriw, sanaat, servis hám turizm baǵdarlarına qánigelesiwin tereńlestiriw baǵdarlaması islep shıǵıldı.

Baǵdarlama sheńberinde 5 mıń gektar eski baǵ hám júzim atızlarında sertifikatlanǵan náller egiw, 4,6 mıń gektar sanaatlastırılǵan plantaciyalar jaratıw, 10 mıń gektar xalıqtıń qıytaq jer hám ijara jer maydanlarında ónimdarlıǵı joqarı hám eksportqa qolaylı ónimler jetistiriw, 101 mıń bas sharwa mallarınıń násilin jańalaw, 5 sanaat mikroorayları, 6 iri turizm komplekslerin shólkemlestiriw, hár bir rayon orayında dem alıw baǵların qurıw hám adamlar kóp toplanatuǵın kósheler shólkemlestiriw sıyaqlı jumıslar ámelge asırıladı.

Májiliste “drayver” joybarlar infrastrukturasın bekkemlew ushın usı jılı 200 milliard sum ajıratılatuǵını belgilendi. Sanaattı rawajlandırıw maqsetinde 2026-2027-jıllarda ulıwma bahası 2,7 milliard dollarlıq iri investiciyalıq joybarlar ámelge asırıladı. Onda wálayattaǵı qorǵasın-cink, volfram, altın hám basqa da rudalıq emes kánlerden nátiyjeli paydalanıw kerek ekenligi kórsetip ótildi.

Zjmin rayonında awıl xojalıǵı ilimiy-sanaat parki joybarınıń prezentaciyasında mákkeni qayta islep, joqarı fruktozalı sirop hám alluloza islep shıǵarıw quwatlıqların jaratıw rejelestirilgeni aytıldı.
Sonday-aq, awıl xojalıǵı baǵdarında násilli sharwa malların satıp alıw, túyeshilikti rawajlandırıw, “Jayılma” kanalın rekonstrukciyalaw ilajları kóriledi.

Mámleketimiz basshısı wálayattı rawajlandırıwda tawlı hám shól aymaqlarınıń potencialın ayrıqsha kózqaraslar tiykarında júzege shıǵarıw zárúr ekenligin atap ótti. Sonıń ishinde, usı jılı 25 mıń gektar suwǵarılmaytuǵın hám jaylaw jerlerin paydalanıwǵa kirgiziw hám jaylawlardan nátiyjeli paydalanıw boyınsha úsh jıllıq baǵdarlama islep shıǵıw rejelestirilgen.
Májiliste Jizzaq wálayatınıń turizm potencialı da tallandı. Aydar-Arnasay kóller sisteması, sonday-aq, Baxmal, Farish, Zafarabad, Sharaf Rashidov hám Ǵallaaral rayonlarınıń imkaniyatları tolıq iske qosılmay atırǵanı atap ótildi.

Usı múnásibet penen bul rayonlarda turizm komplekslerin shólkemlestiriw, Arnasay aeroportın keńeytiw, xalıqaralıq avtomobil jolları boyında sawda-servis komplekslerin qurıw rejeleri kórip shıǵıldı.
Usı jılı máhállelerde sociallıq obektler, jollar, ishimlik suwı, kanalizaciya hám elektr tarmaqlarınıń qurılısı ushın 30 million dollar, kelesi jılı bolsa jáne 10 million dollar qarjı ajıratıladı. Sonıń esabınan 14 máhálledegi sociallıq taraw obektleri, alıs 28 máhálleni baylanıstırıwshı 105 kilometr jollar, 9 máhálle xalqı ushın 50 kilometr ishimlik suwı, elektr tarmaqları, 13 máhállede 65 kilometr aqaba suw tarmaqları qurıladı hám ońlanadı.

Qala qurılısı baǵdarında Baxmal, Zafarabad hám Ǵallaaral rayonların kosmostan rejelestiriw hám bas rejelerin islep shıǵıw názerde tutılǵan.
Sonday-aq, Jizzaq qalası hám Sharaf Rashidov rayonı birden-bir aglomeraciya aymaǵı sıpatında rawajlandırıladı. Bul boyınsha islep shıǵılatuǵın bas rejede qala ishindegi tıǵılıslardı azaytıw maqsetinde 10 kilometrlik aylanba jol qurıw, qala hám rayondı baylanıstıratuǵın birden-bir jámiyetlik transport sistemasın jolǵa qoyıw, birden-bir hákimshilik imarat qurıw arqalı shólkemlerdi bir jerge kóshiriw názerde tutıladı.

Májilis juwmaǵında juwapkerlerge wálayattı bunnan bılay da rawajlandırıw sheńberindegi hár bir joybardı xalıqtıń bántligi hám turmıs dárejesin arttırıw menen baylanıstırıp orınlaw boyınsha tapsırmalar berildi.