Densawlıqtı saqlaw sistemasın jetilistiriw boyınsha kompleksli ilajlar tanıstırıldı

Prezentaciyada, bárinen burın, ótkir júrek-qan tamır hám cerebrovaskulyar keselliklerdiń aldın alıw hám emlewdi jetilistiriw boyınsha islep shıǵılǵan ilajlar dodalandı.
Rejege bola, “Stent for Life” hám “Action Plan for Stroke” xalıqaralıq baǵdarlamaları tiykarında islep shıǵılǵan “Infarkt hám insultqa qarsı gúresiw” milliy baǵdarlaması 2026-jıl 1-maydan baslap Samarqand wálayatı hám Tashkent qalasında, 1-oktyabrden Ándijan, Namangan hám Ferǵana wálayatlarında, 2027-jıldan bolsa basqa aymaqlarda ámeliyatqa engiziledi.

Milliy baǵdarlama sheńberinde 30 jastan asqan xalıq arasında sorawnama ótkeriw hám nátiyjesine bola anıqlanǵan qáwip toparına tiyisli puqaralardı maqsetli medicinalıq tekseriwlerden ótkeriw jáne nawqaslarǵa qıstawlı medicinalıq xızmet kórsetiw algoritmlerin hám klinikalıq marshrutların ámeliyatqa engiziw názerde tutılǵan.
Sonday-aq, bul keselliklerde qıstawlı medicinalıq járdem kórsetiwde xalıqaralıq standartlarǵa muwapıq “altın saat” principiniń waqıt normaları engiziledi.

Prezentaciyada tez medicinalıq járdem xızmetiniń materiallıq-texnikalıq hám sanlı imkaniyatların keskin arttırıwǵa qaratılǵan ilajlar da keltirilgen. Brigadalar telemetrlik elektrokardiograf hám monitorlı defibrillyatorlar menen támiyinlenedi. Sonıń ishinde, EKG nátiyjelerin jasalma intellekt járdeminde tallaw hám málimleme sisteması arqalı jiberiw, sonday-aq, tez medicinalıq járdem brigadaları hám emlewxanalar arasında real waqıt rejiminde maǵlıwmat almasıw engiziledi.

Stacionar medicina mákemelerinde insulttı jasalma intellekt tiykarında diagnozlaw imkaniyatı jaratılıp, nawqaslardıń háreketleniw marshrutı sanlastırıladı. Emlewxanalar bolsa qıstawlı jaǵdaylarda xirurgiyalıq ámeliyatlardı ótkeriw ushın tromb eritiwshi dári quralları hám zárúr jumsaw materialları menen támiyinlenedi.

Qıstawlı stacionar medicinalıq xızmet kórsetiwge mámleketlik emes medicina shólkemlerin tartıw, ótkir júrek-qan tamır hám bas miyde qan aylanıwınıń ótkir buzılıwı jaǵdaylarında kórsetilgen medicinalıq xızmetler Mámleketlik medicinalıq qamsızlandırıw qorı arqalı qarjılandırıladı.

Milliy baǵdarlama sheńberinde “Elektron densawlıqtı saqlaw” málimleme sistemasında nawqaslar hám qáwip toparındaǵı xalıqtıń elektron reestri júrgiziliwi támiyinlenedi.
Xalıq arasında profilaktika hám úgit-násiyatlaw jumıslarına da ayrıqsha itibar qaratıldı. ǴXQ hám sociallıq tarmaqlarda sociallıq rolikler, infografika, animaciya hám qısqa metrajlı videorolikler tarqatıw, bazar hám sawda orayları janında bilbord hám bannerler ornatıw, bilimlendiriw mákemeleri, kárxana hám máhállelerde infarkt hám insult belgilerin erte anıqlaw boyınsha seminar-treningler ótkeriw rejelestirilgen.

Sonday-aq, “Angels Initiative” xalıqaralıq baslamasınıń “FAST Heroes” baǵdarlaması tiykarında mektep oqıwshıları ushın arnawlı shınıǵıwlar shólkemlestiriledi. Hár jılı 29-sentyabr – Dúnya júzilik júrek kúni hám 29-oktyabr – Dúnya júzilik insultqa qarsı gúresiw kúni múnásibeti menen biypul qan basımı, qant hám xolesterin kórsetkishlerin ólshew, xalıqtıń qıstawlı járdem kórsetiw boyınsha sawatlılıǵın arttırıwǵa qaratılǵan ǵalabalıq ilajlar ótkeriledi.

Baǵdarlamanı qarjılandırıwǵa 2026-jılı 239 milliard sum, 2027-jıldan baslap 280 milliard sum ajıratılatuǵını atap ótildi.
Prezentaciyada, sonday-aq, 2026-2030-jıllarda qan menen islesiw xızmetin bunnan bılay da jetilistiriw boyınsha usınıslar kórip shıǵıldı.

Qan ónimlerine talap artıp baratırǵanın esapqa alıp, xızmet imkaniyatların keńeytiw hám emlew mákemeleriniń qan hám qan ónimlerine bolǵan talabın tolıq támiyinlewge qaratılǵan maqsetli ilajlar islep shıǵılǵan.
Sonıń ishinde, Jáhán densawlıqtı saqlaw shólkeminiń usınısları tiykarında hár mıń xalıqqa qan tapsırıwlardıń sanın 10 nan 30 ǵa shekem arttırıw, jámi donorlardıń sanın 1 millionǵa shekem kóbeytiw arqalı tayarlanatuǵın qan rezervin 150 mıń litrden 450 mıń litrge jetkeriw, biyǵárez qan donorlarınıń sanın 300 mıńnan 900 mıńǵa jetkeriw maqset etilgen.

Jetekshi xalıqaralıq tájiriybe tiykarında qan hám onıń quramlıq bólekleriniń qáwipsizligin támiyinlewge qaratılǵan standart operaciyalıq processler, qáwipsizlik protokolları hám zamanagóy skrining usılları engiziledi. Sonıń menen birge, qan xızmeti sisteması xızmetkerleriniń kásiplik bilim hám kónlikpeleri arttırıladı, materiallıq-texnikalıq bazası bekkemlenedi hám biyǵárez donorlıq háreketi qollap-quwatlanadı.

Qan menen islesiw sistemasın túp-tiykarınan jetilistiriw ushın “qajetlik – qayta islew – jetkerip beriw” shınjırında processlerdi basqarıw sisteması engiziledi.
Sanlı platforma sheńberinde “Qan ónimleriniń elektron esabın júrgiziw” málimleme sisteması engizilip, qan hám onıń quramlıq bólekleriniń háreketin qadaǵalaw, qıstawlı medicinalıq járdem menen integraciyalanǵan halda buyırtpa beriw, mákemelerdiń rezervin onlayn monitoring etiw imkaniyatı jaratıladı.

Qan menen islesiw xızmetin qarjılandırıw ushın 2026-jılı 308 milliard sum, 2026-2030-jılları bolsa tarawdı jetilistiriwge jámi 1,75 trillion sum názerde tutılǵanı atap ótildi.

Prezentaciyada respublikalıq qánigelestirilgen ilimiy-ámeliy oraylar hám klinikalardıń jumısın úyreniw nátiyjeleri haqqında málimleme berildi.

Jumısshı toparlar 2025-jıl sentyabr-dekabr aylarında 37 respublika dárejesindegi medicina orayları hám klinikalardıń jumısın kompleksli úyrenip, bir qatar shólkemlestiriw hám basqarıw kemshiliklerin anıqlaǵan. Olardı saplastırıw ushın 27 bántten ibarat ilajlar rejesi islep shıǵılǵan bolıp, ol medicinalıq xızmettiń sapasın arttırıw, aymaqlar menen jumıstı sistemalı jolǵa qoyıw, basqarıw sistemasın jetilistiriw, kadrlar potencialı hám ilimiy-izertlew jumısı, finanslıq tártip hám resurslardan nátiyjeli paydalanıw baǵdarların qamtıp aladı.

Densawlıqtı saqlaw sistemasın reformalawda sırt el ekspertlerin tartıw máselesi de dodalandı.

Jámiyetlik salamatlıq, densawlıqtı saqlawdı rejelestiriw hám milliy laboratoriya sistemasın reformalaw boyınsha texnikalıq shártler islep shıǵılǵan bolıp, bul ilajlardı ámelge asırıwda 25 xalıqaralıq hám 19 jergilikli ekspertti tartıw usınıs etildi.
Sonday-aq, Respublikalıq onkologiya orayı hám onıń aymaqlıq filialların modernizaciyalaw joybarı tanıstırıldı.

2021-jılı Islam rawajlanıw banki menen birgelikte “Ózbekstan Respublikası onkologiya mákemelerin modernizaciyalaw (II basqısh) ” joybarı sheńberinde oraydıń jańa kompleksi hám onıń 13 filialı ushın jámi 61 million dollarlıq 119 túrdegi medicinalıq úskeneler satıp alınǵan. Jáne 5,6 million dollar esabınan qosımsha 5 túrdegi úskeneler satıp alınıwı názerde tutılǵan.

Oǵan qosımsha túrde tartılatuǵın 10 million dollar esabınan oray ushın 80 túrdegi 1027 dana medicinalıq úskeneler, sonday-aq, radiofarmacevtikalıq ónimler islep shıǵarıwǵa mólsherlengen ciklotron hám radiosintez laboratoriyasın satıp alıw usınıs etildi.
Sonday-aq, mámleketimiz basshısına farmacevtika tarmaǵın rawajlandırıw, xalıqtı arzan hám sapalı dári-dármaqlar menen támiyinlew boyınsha ámelge asırılıp atırǵan jumıslar haqqında málimleme berildi.

Farmacevtika tarmaǵı házirgi waqıtta sanaatımızdıń joqarı pátlerde ósip atırǵan baǵdarlarınan birine aylanbaqta. Búgingi kúnde tarmaqta 2,3 milliard dollarlıq 156 joybar ámelge asırılmaqta, 2025-jılı 362 million dollarlıq sırt el investiciyaları ózlestirildi hám 2,4 mıńnan aslam jańa jumıs orınları jaratıldı.
Tarmaq kárxanaları tárepinen bahası 7,3 trillion sumlıq ónim islep shıǵarıldı, dúnyanıń 55 mámleketine 220 million dollarlıq ónimler eksport etildi.

Dári-dármaqlardıń sapasın támiyinlew hám byurokratiyanı qısqartıw boyınsha ámelge asırılǵan sońǵı reformalar nátiyjesinde isbilermenler tárepinen birinshi márte 130 túrdegi import dári-dármaqlardı transfer texnologiyası tiykarında Ózbekstanda islep shıǵarıw boyınsha jumıslar baslandı.

Sonday-aq, 2 mıń atamadaǵı import dári-dármaqlardıń referent bahaları qayta belgilengeni esabınan dári-dármaqlardıń kótere bahaları 40-60 procentke tómenletildi.

Prezentaciyada importtıń ornın basatuǵın jergilikli dári-dármaqlardıń sapasın arttırıw hám ǵalabalıǵın támiyinlew, bunıń ushın investorlarǵa zárúr sharayatlar jaratıw, óndiris hám laboratoriya quwatlıqların arttırıw jáne ashıq-aydın sapa qadaǵalaw sistemasın jolǵa qoyıw zárúrligi atap ótildi.

Prezidentimiz usınıslardı maqullap, tiyisli qararlarǵa qol qoydı. Juwapkerlerge belgilengen ilajlardı óz waqtında hám sapalı orınlaw, dodalanǵan baǵdarlarda anıq nátiyjelerge erisiw tapsırıldı.