Avtomobil jolları tarawındaǵı jumıslardıń jaǵdayı hám gezektegi wazıypalar kórip shıǵıldı

Keyingi úsh jılda tarawda orınlanǵan jumıslar, qarjılandırıw kólemi hám ámeliy nátiyjeler haqqında maǵlıwmat berildi.
Usı dáwir ishinde avtomobil jolları tarawına derlik 40 trillion sum ajıratılıp, 63 mıń kilometr jolda qurılıs hám ońlaw jumısları orınlandı. Tarawǵa sırttan tartılıp atırǵan qarjılar 3 esege artıp, 2025-jılı 1,2 milliard dollarǵa jetti. Jol qurılısında úlgilerden waz keshilip, hár bir aymaqtıń geologiyalıq hám ekologiyalıq ózgesheliklerinen kelip shıqqan halda joybarlaw ámeliyatı engizildi. Zamanagóy túrdegi qaplamalar islep shıǵılıp, jollardıń xızmet múddeti 1,5 esege arttırıldı.
Prezentaciyada tarawdaǵı bar mashqalalardı sheshiw boyınsha usınıslar hám rejeler tanıstırıldı. Bárinen burın, bar ulıwma paydalanıwdaǵı hám ishki jollar jáne kópirlerdi ońlaw, jańaların qurıwda aldınǵı tájiriybe hám dúnyada ózin aqlaǵan texnologiyalardan paydalanıw tómen ekenligi atap ótildi.
Kelesi jıllarda 21 mıń kilometr jollardı qurıw hám ońlaw, 14 mıń kilometr topıraq jollarǵa shaǵıl tas hám qum aralaspasın tósew hám 325 kópirdi ońlaw rejelestirilgen. Onda sırt elli ekspertler hám texnologiyalardı keńnen tartıw, aldınǵı standartlardı engizgen halda jumıstı shólkemlestiriw tapsırıldı.
Salmaǵı normadan artıq júk avtomashinalarınıń háreketleniwi aqıbetinde 1800 kilometr jol ońlawǵa mútáj halǵa kelip qalǵanı kórsetip ótildi.
Usı múnásibet penen júk transportınıń salmaǵın qadaǵalaw ushın ólshew tárezileri tarmaǵın keńeytiw zárúrligi atap ótildi. Házirgi waqıtta 9 sonday tárezi ornatılǵan, 8 in ornatıw jumısları dawam etpekte. Keleshekte jáne 35 kóshpeli hám stacionar qadaǵalaw-ólshew punktin qurıwǵa tapsırma berildi.
Juwapkerlerge salmaq hám gabarit qadaǵalawı menen baylanıslı barlıq processlerdi qamtıp alǵan uyımlararalıq elektron málimleme sistemasın iske qosıw tapsırıldı. Sonday-aq, hawa-rayı sharayatlarınan kelip shıǵıp, awır salmaqlı transport qurallarınıń háreketin máwsimlik sheklew tártibin islep shıǵıw usınıs etildi.
Búgingi kúnde jańa jollardıń 61 procentin, “Baslamalı byudjet” sheńberinde bolsa ishki jollardıń 92 procentin jeke menshik sektor qurmaqta. Uzaq jıllar mámleket monopoliyasında bolǵan jollardı saqlaw jumısları da basqıshpa-basqısh jeke menshik sheriklikke berilmekte.
Bul jumıslardı keńeytip, kelesi jılı 3 mıń kilometr, 2030-jılǵa barıp bolsa 6,3 mıń kilometr jollardı saqlawǵa isbilermenlerdi tartıw rejelestirilgen. Sonday-aq, Aziya rawajlanıw bankiniń qatnasıwında 86 rayonda qurılatuǵın jollardı tolıq jergilikli jumıstı bólip alıp islewshilerge beriw zárúr ekenligi kórsetip ótildi.
Tarawda sanlastırıw dárejesi tómen ekeni, bar 59 xızmetten tek ǵana 20 sı sanlastırılǵanı atap ótildi. Kelesi jılı 28 xızmetti elektron túrge ótkeriw, intellektuallıq transport sistemasın engiziw hám 7 jańa elektron platformanı islep shıǵıw áhmiyetli ekenligi atap ótildi.
Prezentaciya juwmaǵında belgilengen wazıypalardan kelip shıqqan halda, Ózbekstan avtomobil jolların 2035-jılǵa shekem rawajlandırıw strategiyasın islep shıǵıw wazıypası tapsırıldı.