Mámleketlik uyımlar hám xalıq arasındaǵı sóylesiw mexanizmlerin jáne de jetilistiriw máseleleri dodalandı

Elimizde mámleketlik hám jámiyetlik turmıstıń barlıq tarawlarında ámelge asırılıp atırǵan keń kólemli jańalanıwlar procesinde xalıqtıń múrájatları menen islesiw sistemasın da jetilistiriw, Xalıq qabıllawxanalarınıń imkaniyatların keńeytiw, jumısına zamanagóy qatnaslardı engiziw, jámiyetshiliktiń pikirin tereńirek úyreniw hám qararlar qabıl etiwde onı esapqa alıw barǵan sayın úlken áhmiyetke iye bolıp atırǵanı atap ótildi.

Xalıqtıń keypiyatı, talap hám arzıw-niyetlerin anıq jáne tolıq úyreniwde zamanagóy, professional sociologiya hám tallaw usıllarınan paydalanıw zárúr ekenligi, bul reformalar qanshelli nátiyjeli bolıp atırǵanı haqqında qalıs málimleme alıw jáne keleshekke mólsherlengen rawajlanıw baǵdarlamaların durıs islep shıǵıwdıń áhmiyetli faktorı ekeni kórsetip ótildi.

Prezidentimiz xalıq penen pikirlesiw mádeniyatın izbe-iz arttırıw, puqaralardı tıńlaw, olardıń pikir-usınısların esapqa alǵan halda qarar qabıl etiw mámleketlik uyımlardıń jumısında baslı norma bolıwı shárt ekenligin atap ótti.

Puqaralardan kelip túsip atırǵan múrájatlarǵa tek ǵana operativ juwap beriw emes, al olardı sistemalı tallap, sociologiyalıq izertlewler nátiyjeleri menen salıstırıw arqalı tiyisli sheshimlerdi usınıs etiw, ulıwma, mámleket hám jámiyet arasındaǵı qarım-qatnastıń sapasın hám isenimdi bekkemlew mámleketlik hám basqarıw uyımları, jergilikli atqarıw hákimiyatı uyımlarınıń tiykarǵı wazıypalarınan biri ekeni jáne bir márte kórsetip ótildi.

Hákimiyat hám xalıq arasındaǵı turaqlı qarım-qatnastıń institucionallıq tiykarların bekkemlep, jańasha qatnasıqlarǵa tiykarlanǵan zamanagóy modelin qáliplestiriw, onı jámiyetlik pikirdi úyreniw sistemasına baylanıstırıw áhmiyetli ekeni atap ótildi.
Juwapkerlerge xalıq penen pikirlesiw mexanizmlerin bunnan bılay da jetilistiriw, puqaralardıń múrájatları menen islesiw nátiyjeliligin arttırıw boyınsha tiyisli tapsırmalar berildi.