Turkiy dunyo kreativ yoshlari markazi O‘zbekistonda tashkil etiladi
2024-09-10 18:05:00 / Yangiliklar
Qozog‘iston Respublikasining Ostona shahrida Turkiy davlatlar tashkilotining Yoshlar va sport masalalari bo‘yicha vazirlarining 8-yig‘ilishi bo‘lib o‘tdi. Tadbirda Sport vaziri Adham Ikramov va Yoshlar ishlari agentligi direktorining birinchi o‘rinbosari Dilnoza Kattaxanova ham qatnashdi.
Mazkur uchrashuvda Turkiy dunyo kreativ yoshlari markazining ochilish marosimini 2025-yilda O‘zbekistonda o‘tkazish va markaz faoliyatini yo‘lga qo‘yish bo‘yicha amaliy hamkorlikning dolzarb masalalari muhokama qilindi. Shuningdek, 2025-yilda Turkiy davlatlar tashkilotiga a’zo mamlakatlarda o‘tkaziladigan yoshlar loyihalari va tadbirlar ham belgilab olindi.
Eslatib o‘tamiz, 2023-yil 3-noyabr kuni Qozog‘iston Respublikasining Ostona shahrida o‘tkazilgan Turkiy davlatlar tashkiloti Davlat rahbarlari kengashi majlisida davlatimiz rahbari tomonidan O‘zbekistonda Turkiy dunyo kreativ yoshlari markazini ochish taklifi bildirilgan edi.