Xorazm viloyati Xonqa tumani hokimligi

Xonqa tumani IIB boshlig‘i podpolkovnik S.R.Vapayevning mahallalardagi kriminogen vaziyat bo‘yicha c

Assalomu alaykum, tumanimiz aholisi!

2026-yilning o‘tgan ikki oyi davomida Xonqa tumani hududida jami 7 ta yo‘l-transport hodisasi (YTX) sodir etilib, bu ko‘rsatkich o‘tgan yilning mos davriga nisbatan 250 foizga oshdi. Afsuski, ushbu ko‘ngilsiz hodisalar natijasida 3 nafar fuqaro vafot etdi, 4 nafar fuqaro esa turli darajadagi tan jarohatlari oldi.

Ushbu raqamlar har birimiz uchun jiddiy ogohlantirish bo‘lishi lozim. O‘tkazilgan tahlillar shuni ko‘rsatmoqdaki, yo‘l-transport hodisalarining asosiy sabablari quyidagilardan iborat:

• Haydovchilar tomonidan yo‘l harakati qoidalariga amal qilinmasligi;

• Belgilangan tezlik me’yorlarini oshirish;

• Transport vositasini mast holatda boshqarish;

• Piyodalarning yo‘lda belgilangan qoidalarga rioya etmasligi.

Shu munosabat bilan, barcha haydovchilardan transport vositalarini boshqarishda o‘ta ehtiyotkor bo‘lishni, tezlik me’yorlariga qat’iy amal qilishni hamda bolalar va keksalar xavfsizligini ustuvor vazifa deb bilishni so‘raymiz. Piyodalardan esa yo‘lni faqat belgilangan joylardan kesib o‘tishni, o‘z hayoti va sog‘lig‘iga beparvo bo‘lmaslikni talab qilamiz.

Har bir yo‘l-transport hodisasi ortida inson taqdiri va oila qayg‘usi turganini unutmaylik. Yo‘l harakati qoidalariga amal qilish — shunchaki qonun talabi emas, balki eng avvalo inson hayotini asrash demakdir.

Tuman prokuraturasi, ichki ishlar organlari va tegishli tashkilotlar bilan hamkorlikda YTXlarning oldini olish hamda aholi o‘rtasida huquqiy targ‘ibot ishlarini kuchaytirish bo‘yicha zarur chora-tadbirlar qat’iy davom ettiriladi.

Aziz fuqarolar! Agar har birimiz yo‘l qoidalariga mas’uliyat bilan yondashsak, mudhish fojialarning oldini olgan bo‘lamiz. Befarq bo‘lmaylik, o‘zimiz va yaqinlarimiz hayotini asraylik!

Xonqa tumani IIB boshlig‘i podpolkovnik S.R.Vapayev