Hurmatli Prezidentimizning 2024-yil 29-noyabrdagi “Xorazm viloyatini ijtimoiy-iqtisodiy rivojlantirishni jadallashtirish bo‘yicha qo‘shimcha chora-tadbirlar to‘g‘risida”gi qarori qabul qilindi.

Hammamizga ma’lum, hurmatli Prezidentimizning xalqimizga bo‘lgan e’tibori va g‘amxo‘rligi tufayli har bir soha bo‘yicha 2025-yil davomida qilinadigan ishlarni belgilab olgan edik.

Misol uchun, asosiy ko‘rsatkichlar, kambag‘allik, ishsizlik, yettilik tomonidan amalga oshiriladigan ishlar, yangi ko‘p qavatli uy-joylar, ijtimoiy soha obyektlari va boshqa infratuzilma obyektlari bo‘yicha sezilarli o‘sishga erishildi.

 2025-yil davomida qilingan va 2026-yilda oldimizga qo‘ygan rejalarimizga to‘xtalib o‘tsam.

2025-yil yakuni bilan sanoat mahsulotlari 108 foizga (1,3 trln so‘m), qishloq xo‘jaligi mahsulotlari 105 foizga (3,5 trln so‘m), bajarilgan qurilish ishlari 118 foizga (0,8 trln so‘m) va xizmatlar hajmi esa 115,4 foizga (1,4 trln so‘m) o‘sganligi buning yaqqol misolidir.

Aholi jon boshiga sanoat mahsulotlari ishlab chiqarish 6,5 mln so‘mga, qishloq xo‘jaligi 17,0 mln so‘mga, xizmatlar hajmi 6,8 mln so‘mga, bajarilgan qurilish ishlari 4,0 mln so‘mga yetkazildi.

Sanoat hamda qishloq xo‘jaligi mahsulotlari eksporti hajmi 49,2 mln dollarni tashkil etdi. Ushbu ko‘rsatkich 2020-yilga nisbatan sal kam 124 foizni tashkil etadi.

Tumanimizda 2025-yil davomida 339 mlrd so‘mlik 48 ta yangi loyiha ishga tushirilib, 1 ming 668 ta ish o‘rni yaratildi.

O‘tgan yil davomida oilaviy tadbirkorlik, Kichik biznesni qo‘llab-quvvatlash va “Birinchi qadam” dasturi doirasida 3 ming 750 nafar subyektga 116 mlrd so‘m kredit ajratilishi hisobiga 4 ming 600 nafar ish o‘rni yaratildi.

Shuningdek, “Sayxunobod tajribasi” doirasida hokim yordamchilari tomonidan mahallalarda 1 777 ta mikroloyiha amalga oshirilib, 3 554 nafarga yaqin aholining bandligi ta’minlandi.

Bundan tashqari, 1 420 nafar fuqarolar kasb-hunarga o‘qitildi.

Hurmatli Prezidentimiz tomonidan yaratib berilgan imkoniyat va imtiyozlar hisobiga 30 ming nafardan ortiq aholining bandligi ta’minlandi.

Xususan, investitsiyalar hisobiga 900 nafar, doimiy ishga joylashtirish va tadbirkorlik hisobiga 21 ming nafar (119 foiz), qishloq xo‘jaligida 7,3 ming nafar (103 foiz) hamda qurilishda 845 nafar (100 foiz).

O‘tgan 2025-yil boshidan tumanimizda 5,7 mingdan ortiq kambag‘al oilalarning (oila a’zolari 25 ming nafar) 3,9 mingtasi (17,6 ming nafar) kambag‘allikdan chiqarildi.

Shuningdek, 4,5 mingta oilaning turmushida ijobiy o‘zgarishlar bo‘lib, daromadi o‘rtacha 2,5–3 mln so‘mgacha oshdi.

Natijada, kambag‘allik darajasi 2025-yil boshidagi 12,3 foizdan 3,7 foizga (3 barobarga) va ishsizlik darajasi 5,2 foizdan 4,3 foizga tushirishga erishildi.

Ma’lumot uchun, kambag‘al oilalar reyestrida hozirgi kunda 1,8 mingta oila (7,4 ming nafar aholi) ro‘yxatga kiritilgan bo‘lib, reyestr bo‘yicha kambag‘allik darajasi 3,6 foizni tashkil qilmoqda.

Shu bilan birga, jami manbalar hisobidan tuman infratuzilmalarini yaxshilash hamda aholi turmush darajasini oshirish maqsadida qariyb 306 mlrd so‘m (respublika budjeti 105,5 mlrd so‘m, mahalliy budjet 30 mlrd so‘m, ipoteka kredit resurslari 120 mlrd so‘m, uy-joyga muhtoj 250 ta oilaga 7,5 mlrd so‘m subsidiya, XMI mablag‘lari 43 mlrd so‘m) mablag‘lar ajratib berildi.

Xususan, ushbu mablag‘lar hisobiga 21 km ichimlik va oqova suv tarmoqlari, 62 km avtomobil yo‘llari va 5 ta ko‘prik, 25 km elektr tarmoqlari, 18 ta transformator, 4 ta maktab, 4 ta maktabgacha ta’lim tashkiloti qurib bitkazildi.

Shuningdek, “og‘ir” toifadagi 6 ta mahallaga infratuzilmani yaxshilash uchun 19 mlrd so‘m ajratildi.

Ushbu mablag‘lar hisobiga 3 ta mahallada aholi tomorqalarini sug‘orish tizimlari va 5 ta mahallada elektr ta’minoti yaxshilandi hamda 1 750 tadan ortiq xonadondagi 350 gektar (aholi tomorqasi 132 gektar, dala tomorqasi 218 gektar) tomorqa yerlariga suv yetib borishi ta’minlandi.

“Zarbador tajribasi” doirasida jami 5 ta “drayver” loyiha shakllantirilib, infratuzilma bilan ta’minlash uchun budjetdan 2025-yilda 19,6 mlrd so‘m mablag‘ ajratildi. “Drayver” loyihalarni zarur infratuzilmalar bilan ta’minlash uchun 21 ta obyektda qurilish ishlari bajarildi. Natijada 155 ta yangi ish o‘rni yaratildi.

Tumanda Xalqlar do‘stligi ko‘chasi 24/7 rejimida ishlovchi markaziy ko‘chaga aylantirilib, uning infratuzilmasini yaxshilash uchun 4,8 mlrd so‘m ajratildi. Natijada 4 mlrd so‘mlik 14 ta savdo va xizmat ko‘rsatish obyekti ishga tushirilib, 30 ta ish o‘rni yaratildi.

Muhtaram Prezidentimiz tashabbuslari bilan tuman markaziga tutash hududdan “Yangi O‘zbekiston” massivi tashkil qilish uchun ajratib berilgan 10 ga ekin yer maydonida olib borilayotgan ishlar xalqimizning ulkan bunyodkorlik salohiyatidan, yaratuvchilik qudratidan darak berib turibdi.

Ushbu “Yangi O‘zbekiston” massivida jami 1 ming 228 ta xonadondan iborat 46 ta ko‘p qavatli uylar qurilib, foydalanishga topshirildi.

Shu bilan birga, aynan massiv aholisi uchun 150 o‘rinli maktabgacha ta’lim tashkiloti, 330 o‘quv o‘rinli maktab faoliyatini boshladi.

Tumanda uy-joyga talab yuqori bo‘lganligi sababli Davlatimiz rahbari tashabbusi bilan master-reja asosida qo‘shimcha 3 gektar yer maydonida 7–9 qavatli 16 ta uy qurilishi boshlab yuborildi.

Buning natijasida 1–2-qavatida 84 taga yaqin tadbirkorlik obyekti bo‘lgan 854 ta xonadondan iborat uy-joylar quriladi.

Tumanimizda 2025-yil davomida qishloq xo‘jaligi sohasida ham bir qancha ishlar amalga oshirildi. Shundan asosiy raqamlarga to‘xtalib o‘tsam: fermer xo‘jaliklari tomonidan 43 ming tonna paxta, 52 ming tonna g‘alla, 287 tonna pilla, 16 ming tonna meva, 72 ming tonna sabzavot mahsulotlari yetishtirilib, belgilangan rejalar ziyodi bilan bajarildi.

 2026-yil davomida qilinadigan ishlarni aytib o‘tsam.

2026-yilda sanoat mahsulotlari ishlab chiqarishni 106,9 foizga (1,5 trln so‘m), qishloq xo‘jaligida mahsulot ishlab chiqarishni 104,6 foizga (4,1 trln so‘m), amalga oshirilgan qurilish ishlarini 105,9 foizga (831 mlrd so‘m) va ko‘rsatilgan jami xizmatlar hajmini 113,4 foizga (1,7 trln so‘m) hamda eksport hajmini 50 mln dollarga yetkazishni rejalashtirdik.

Hududiy investitsiya dasturi doirasida 463 mlrd so‘mlik 44 ta yangi loyiha ishga tushirilib, 2 ming 196 ta ish o‘rni yaratish belgilandi.

Bundan tashqari, “Sayxunobod tajribasi” doirasida mahallalarda hokim yordamchilari tomonidan 1 650 ta mikroloyiha amalga oshiriladi va 105 ta xonadonga “loyiha paketlari” taqdim etiladi.

Shuningdek, 2026-yilda 31,6 ming nafar aholining bandligini ta’minlash (shundan 4,6 ming nafar doimiy ishga, 22,2 ming nafar daromadi oshiriladi va 4,8 ming nafari soyadan chiqariladi), 1,8 mingta oilani kambag‘allikdan chiqarish bo‘yicha aniq rejalar belgilandi.

Bunda yangidan 500 tadan ortiq kichik biznes subyekti, 540 ta yakka tartibdagi tadbirkorlik subyekti tashkil qilinadi va tadbirkorlik subyektlarini qo‘llab-quvvatlash maqsadida kichik va o‘rta biznesga 918 mlrd so‘m, shundan dasturlar doirasida 191 mlrd so‘m kreditlar ajratiladi.

Davlat investitsiya dasturi hamda xorijiy moliya institutlari mablag‘lari hisobidan 176 mlrd so‘m mablag‘ ajratilib, ushbu mablag‘lar hisobiga 5 ta maktab, 1 ta maktabgacha ta’lim tashkiloti, 2 ta tibbiyot punkti rekonstruksiya qilinadi hamda 93,7 km avtomobil yo‘llari va 1 ta ko‘prik, 9,2 km irrigatsiya tarmoqlari, 14,4 km piyodalar yo‘lakchalari, 50 km elektr tarmoqlari va 25 ta transformator qurib bitkazilib, foydalanishga topshiriladi.

Bundan tashqari, tibbiyot birlashmasini kompleks qayta qurish ishlarini yakunlash, “Vatanparvar” MFYdagi ko‘p qavatli uy-joylarning ta’mirtalab oqova suv tarmog‘ini yangilash va yangi tarmoq qurish hamda “Yangi O‘zbekiston” massivi ichki xo‘jalik yo‘llarini qurish ishlari yakuniga yetkaziladi.

Aholini uy-joy bilan ta’minlash maqsadida 692 ta xonadonli 16 ta ko‘p qavatli uy qurilishi rejalashtirilgan. Shundan, “Yangi O‘zbekiston” massivida 582 ta xonadonli 12 ta ko‘p qavatli uy qurib bitkaziladi.

Prezidentimiz tashabbusi bilan 2026-yilda tumanimizda 2 ta — Obod hamda Znahos mahallalari “Yangi O‘zbekiston” qiyofasidagi mahalla sifatida tanlab olinib, mahalla infratuzilmasini yaxshilash va tadbirkorlikni rivojlantirish maqsadida har bir MFYga 5 mlrd so‘mdan mablag‘ ajratildi.

Kambag‘al oilalarning 405 nafar a’zosini doimiy ish o‘rinlariga joylashtirish, 785 ta oilaning daromadini oshirish, 69 tasini kasb-hunarga o‘rgatish orqali bandligini ta’minlash, 93 tasining norasmiy faoliyatini legallashtirish, 35 ta kambag‘al oila a’zosini rasmiy tashqi mehnat migratsiyasiga jalb qilish va 413 ta kambag‘al oila a’zosini tadbirkorlikka jalb qilish rejalashtirilgan.

Tumanda yuqoridagi ishlarni amalga oshirib, joriy yil yakuni bilan tumanni kambag‘allik va ishsizlikdan holi hududga aylantiramiz.

E’tiboringiz uchun rahmat!