Yo‘lovchi tashish sohasidagi dolzarb masalalar ochiq muloqotda muhokama qilindi
2026-08-06 15:15:00 / Yangiliklar
Namangan viloyatida Transport nazorati inspeksiyasi rahbariyati hamda yo‘lovchi tashuvchi korxonalar rahbarlari va tadbirkorlik subyektlari vakillari ishtirokida ochiq muloqot tashkil etildi.
Uchrashuvdan ko‘zlangan asosiy maqsad yo‘lovchi tashish sohasida yuzaga kelayotgan muammolarni o‘rganish, tadbirkorlarning taklif va murojaatlarini tinglash hamda o‘zaro hamkorlikni yanada mustahkamlashdan iborat bo‘ldi.
Muloqot davomida yo‘lovchi tashish xizmatlari sifatini oshirish, yo‘nalishlarda harakat xavfsizligini ta’minlash, amaldagi qonunchilik talablariga rioya etish, litsenziya va ruxsat berish tartib-taomillariga oid masalalar yuzasidan fikr almashildi. Shuningdek, soha vakillari tomonidan bildirilgan taklif va murojaatlar atroflicha muhokama qilinib, ularni ijobiy hal etish bo‘yicha mas’ullarga tegishli topshiriqlar berildi.
Ta’kidlanganidek, bunday ochiq muloqotlar transport xizmatlari sifatini yanada yuksaltirish, tadbirkorlik subyektlarini qo‘llab-quvvatlash hamda davlat organlari va biznes vakillari o‘rtasidagi samarali hamkorlikni mustahkamlashga xizmat qiladi.