Xorazm viloyatida tashkil etilgan press-tur OAV vakillarida iliq taassurot qoldirdi
2026-07-09 16:50:00 / Yangiliklar
Xorazm viloyatida Transport nazorati inspeksiyasi tashabbusi bilan tashkil etilgan press-tadbirlar press-tur bilan davom etdi.
Press-tur davomida ommaviy axborot vositalari vakillari Transport nazorati inspeksiyasi faoliyati, sohada amalga oshirilayotgan nazorat ishlari hamda zamonaviy infratuzilma loyihalari bilan yaqindan tanishdilar.
Dastlab jurnalistlarga inspeksiya tasarrufidagi zamonaviy talablarga to‘liq javob beradigan maxsus avtotransport vositasi, shuningdek, yuk avtotransport vositalarining vazn va hajm parametrlarini nazorat qilish bo‘yicha olib borilayotgan reyd tadbirlarini bevosita kuzatib, nazorat jarayonining amaliy jihatlari haqida batafsil ma’lumot oldilar.
Press-tur davomida ishtirokchilar "Urganch – Xiva" pullik avtomobil yo‘li qurilishi obyektiga tashrif buyurib, loyiha doirasida amalga oshirilayotgan qurilish ishlari va nazorat tadbirlari bilan tanishdilar.
Shuningdek, suv havzalarida harakat xavfsizligini ta’minlash, kemalarni davlat ro‘yxatidan o‘tkazish, ularning texnik holatini nazorat qilish hamda amaldagi xavfsizlik talablari ijrosi yuzasidan olib borilayotgan ishlar joyiga chiqib ko‘zdan kechirildi. Mazmunli va ochiq muloqot ruhida o‘tgan press-tadbirlar Shovot kanalida kema sayri bilan yakunlandi. Tadbir davomida OAV vakillari sohada amalga oshirilayotgan islohotlar, nazorat tizimining samaradorligi hamda transport xavfsizligini ta’minlash borasidagi amaliy ishlar bilan yaqindan tanishish imkoniyatiga ega bo‘ldilar.