O‘zbekiston Respublikasi Transport Vazirligi Huzuridagi Transport Nazorati Inspeksiyasi

Transport nazorati inspeksiyasi Avtomobil transportida nazorat qilish Navoiy viloyati hududiy bo‘limi inspektorlari xizmat vazifasini bajarish chog‘ida Karmana tumanidagi "Samarqand" YPX maskanida "FAW" rusumli avtotransport vositasini tekshirish uchun to‘xtatgan.   Transport vositasi hujjatlari ko‘zdan kechirilganda unda O‘zbekiston Respublikasi Ma’muriy javobgarlik to‘g‘risidagi kodeksining 125¹-moddasi 4-qismida nazarda tutilgan huquqbuzarlik alomatlari mavjudligi aniqlangan.   Mazkur huquqbuzarlik yuzasidan belgilangan tartibda ma’muriy bayonnoma rasmiylashtirilayotgan vaqtda avtotransport vositasi haydovchisi J.B. bayonnoma rasmiylashtirilmasligi evaziga inspektorga 1 000 000 so‘m miqdorida pora taklif qilgan.   Inspektor fuqaroni bunday harakatlar jinoiy javobgarlikka sabab bo‘lishi mumkinligi haqida ogohlantirganiga qaramay, haydovchi o‘z noqonuniy harakatlarini davom ettirib, inspektorning xizmat vazifasini bajarishiga to‘sqinlik qilgan.   Shundan so‘ng inspektor zudlik bilan Transport nazorati inspeksiyasi rahbariyati, Korrupsiyaga qarshi kurashish bo‘yicha mas’ul xodim, shuningdek, Navoiy viloyati Ichki ishlar boshqarmasi hamda Transport prokuraturasiga mazkur holat yuzasidan xabar bergan.   Tezkor tadbir davomida haydovchi taklif qilgan 1 000 000 so‘m pul mablag‘ining 700 000 so‘mini inspektorga pora tariqasida berayotgan vaqtida prokuratura va ichki ishlar organlari tezkor xodimlari hamda xolislar ishtirokida ashyoviy dalillar bilan qo‘lga olingan.   Hozirda mazkur holat yuzasidan Jinoyat kodeksining tegishli moddalariga asosan jinoyat ishi qo‘zg‘atilib, dastlabki tergov harakatlari olib borilmoqda.