Los-Anjeles-2028: doping profilaktikasi bo‘yicha ishlar jadal ketmoqda
2025-10-08 10:30:00 / Yangiliklar
2025-yil 8-iyul sanasida O‘zbekiston Respublikasi Prezidenti tomonidan imzolangan PQ-221-sonli qaror mamlakat sport hayotida muhim bosqichni belgilab berdi. Mazkur hujjat 2028-yilda AQSHning Los-Anjeles shahrida bo‘lib o‘tadigan XXXIV yozgi Olimpiya va XVIII Paralimpiya o‘yinlariga O‘zbekiston sportchilarini har tomonlama tayyorlashni nazarda tutadi.
Alohida eʼtibor dopingga qarshi kurashish masalasiga qaratildi. Qarorga muvofiq, Milliy terma jamoalar sportchilari bilan dopingga qarshi profilaktik tadbirlar muntazam o‘tkaziladi. Shu bilan birga, sportchilarning antidoping qoidalariga qatʼiy rioya qilishi ustidan samarali nazorat o‘rnatiladi.
O‘zbekiston Milliy antidoping agentligi tomonidan bu boradagi ishlar boshlandi. Agentlik mutaxassislari har bir terma jamoa sportchisi bilan individual tarzda suhbatlar o‘tkazib, ularning dopingga qarshi kurash borasida bilim va xabardorlik darajasini oshirish, shuningdek, sport axloqi va halollik tamoyillarini mustahkamlashga qaratilgan targ‘ibot ishlarini olib bormoqda.
Ushbu qaror nafaqat sportchilarning jismoniy tayyorgarligini, balki o‘zbek sporti halollik, mehnatsevarlik va fidoyilik tamoyillari asosida rivojlanmoqda. 2028-yil Los-Anjelesda bo‘lib o‘tadigan Olimpiya va Paralimpiya o‘yinlarida yurtimiz vakillari nafaqat medallar, balki sport odobi va madaniyati bilan ham dunyo sahnasida o‘z o‘rnini mustahkamlashiga ishonamiz.