“El-yurt umidi” jamg‘armasi stipendiatlari uchun soha faoliyati yarmarkasi tashkil etildi
2025-09-11 17:15:00 / Yangiliklar
Raqamli texnologiyalar vazirligi hamda “El-yurt umidi” jamg‘armasi hamkorligida 2025-yilgi tanlov g‘oliblari ishtirokida forum va yarmarka o‘tkazildi.
Tadbir davomida mamlakatimizda raqamlashtirish yo‘nalishida amalga oshirilayotgan islohotlar, ularning amaliy natijalari va istiqboldagi ustuvor vazifalar muhokama qilindi. Shuningdek, raqamli transformatsiya jarayonlarida iqtidorli yoshlarning o‘rni va ularga yaratilayotgan imkoniyatlar haqida so‘z yuritildi.
Tadbir davomida bo‘sh ish o‘rinlari yarmarkasi tashkil etilib, stipendiatlarga davlat idoralari hamda IT-kompaniyalar bilan bevosita muloqot qilish, mavjud karyera imkoniyatlari bilan tanishish imkoniyati yaratildi.
Mazkur yarmarkada “O‘zkomnazorat” Inspeksiyasi ham ishtirok etib, o‘zining vakant lavozimlarini taqdim etdi. Yoshlar tomonidan Inspeksiya faoliyatiga katta qiziqish bildirildi. Ishtirokchilarga mavjud ish o‘rinlari va tanlov tartiblari haqida batafsil ma’lumotlar berildi.
Forum va yarmarka stipendiatlarning raqamli sohadagi bilim va ko‘nikmalarini yanada rivojlantirish, ularni milliy iqtisodiyotning raqamli transformatsiyasiga faol jalb etish yo‘lidagi muhim qadam bo‘lib xizmat qildi.