Samarqand viloyati bojxona boshqarmasi xodimlari uchun o‘quv-seminar o‘tkazildi
2026-11-16 17:30:00 / Yangiliklar

Mamlakatimizga noqonuniy radioelektron vositalar olib kirilishining oldini olish, shu bilan birga, soha xodimlarining kiberxavfsizlik borasidagi bilimlarini oshirishga qaratilgan o‘quv-amaliy tadbirlar izchil o‘tkazib kelinmoqda. Xususan, “O‘zkomnazorat” inspeksiyasining Samarqand viloyati hududiy bo‘limi tomonidan viloyat bojxona boshqarmasi xodimlari uchun navbatdagi seminar tashkil etildi.
Tadbirda Vazirlar Mahkamasining 801-son qarori bilan tasdiqlangan “Radiochastota spektridan foydalanish sohasida ruxsat etish hamda radioelektron vositalar va yuqori chastotali qurilmalardan foydalanishni tartibga solish to‘g‘risida”gi Nizom talablari hamda Radiochastotalar bo‘yicha Respublika kengashining 2024-yil 13-iyundagi 787-son “Kichik radiusda ishlaydigan qurilmalar uchun radiochastotalar polosasini ajratish to‘g‘risida”gi qarorining mazmun-mohiyati atroflicha yoritildi. Xususan, bojxona postlari orqali viloyat hududiga olib kirilayotgan radioelektron vositalar va yuqori chastotali qurilmalar aniqlanganda, ulardan foydalanish mumkin yoki taqiqlanganligini belgilovchi tegishli texnik ekspertiza xulosasini olish tartibi batafsil tushuntirildi.
Shu bilan birga, “Kibermadaniyatni yuksaltirish oyligi” doirasida ishtirokchilarga kibergigiyena talablari va kiberxavfsizlik madaniyatini shakllantirish bo‘yicha taqdimot namoyish etildi.
