Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi “Oʻzkomnazorat”

Axborotlashtirish va telekommunikatsiyalar sohasida nazorat inspeksiyasi tomonidan Termiz shahrida “Axborot makonida milliy qonunchilik talablari, kontent mas’uliyati va bolalarni zararli axborotdan himoya qilishning dolzarb masalalari” mavzusida hududlararo o‘quv-seminar o‘tkazildi.

Tadbirda mahalliy ijro hokimiyati organlari, ommaviy axborot vositalari, noshirlik va matbaa sohasi hamda tegishli tashkilotlarning 150 nafarga yaqin vakili ishtirok etdi. Seminar Surxondaryo viloyati vakillari uchun an’anaviy shaklda, Qashqadaryo viloyati vakillari uchun esa Zoom platformasi orqali onlayn tarzda tashkil etildi.

Seminarning asosiy maqsadi axborot sohasidagi qonunchilik talablarini tushuntirish, noqonuniy kontent tarqalishining oldini olish hamda bolalarni zararli axborotdan himoya qilish bo‘yicha bilim va amaliy ko‘nikmalarni oshirishdan iborat bo‘ldi.

Bugungi kunda bolalar internetdan faol foydalanmoqda. Shu bilan birga, internetda ularning ruhiyati va tarbiyasiga salbiy ta’sir ko‘rsatishi mumkin bo‘lgan materiallar ham uchraydi. Kiberbulling, yolg‘on xabarlar, qimor o‘yinlari va giyohvandlikni targ‘ib qiluvchi materiallar, shuningdek, sun’iy intellekt yordamida yaratilgan soxta videolar shular jumlasidandir. Bunday axborotlarning tarqalishiga qarshi kurashish va yoshlarni himoya qilish dolzarb vazifalardan biri ekani ta’kidlandi.

Seminarda Inspeksiya tomonidan olib borilgan monitoring natijalari ham taqdim etildi. Joriy yilning birinchi yarmida axborot sohasida qonunbuzilish bilan bog‘liq jami 6 077 ta holat aniqlangan. Shundan 3 652 tasi “UZ” domenidagi veb-saytlarda, 1 347 tasi noshirlik mahsulotlarida, 964 tasi gazeta va jurnallarda hamda 114 tasi teleradiokanallarda qayd etilgan.

Aniqlangan holatlarning asosiy qismini tavakkalchilikka asoslangan o‘yinlar, alkogol va tamaki mahsulotlarining noqonuniy reklamasi hamda axloqsizlikni targ‘ib qiluvchi materiallar tashkil etgan.

O‘quv-seminar davomida ommaviy axborot vositalarini davlat ro‘yxatidan o‘tkazish tartibi, axborot mahsulotlarini yoshga qarab tasniflash, tarqatilayotgan kontent uchun qonunchilikda belgilangan javobgarlik masalalari yuzasidan tushuntirishlar berildi.

Mazkur o‘quv-seminar axborot sohasida faoliyat yurituvchi tashkilotlar o‘rtasidagi hamkorlikni mustahkamlash, qonunchilik talablariga rioya etilishini ta’minlash, axborot mahsulotlarini tayyorlash va tarqatishda mas’uliyatni oshirish, shuningdek, bolalarni zararli axborot ta’siridan himoya qilishga xizmat qiladi.