“O‘zkomnazorat” Inspeksiyasi boshlig‘i Ulug‘nor tumanidagi “Ulug‘bek” MFYda bo‘ldi
2026-09-30 19:00:00 / Majlislar
Aholining sifatli aloqa va zamonaviy raqamli xizmatlardan foydalanish imkoniyatlarini kengaytirish, ayniqsa, olis va ijtimoiy-iqtisodiy jihatdan og‘ir toifaga kiritilgan hududlar infratuzilmasini yaxshilash ustuvor vazifalardan biri hisoblanadi. Shu maqsadda, “O‘zkomnazorat” Inspeksiyasi boshlig‘i F. Rustamov Andijon viloyatining Ulug‘nor tumanidagi “Ulug‘bek” mahalla fuqarolar yig‘iniga tashrif buyurdi.
Tashrif doirasida “mahalla yettiligi” hamda faollar bilan uchrashuv o‘tkazildi. Unda hududning bugungi kundagi telekommunikatsiya ta’minoti, xususan, aholi, yoshlar va tadbirkorlik subyektlarining internet hamda mobil aloqa xizmatlariga bo‘lgan ehtiyojlari atroflicha muhokama qilindi.
Shuningdek, mahalladagi mavjud tayanch baza stansiyalarining texnik holati, mobil aloqa qamrovi hamda xonadonlar va ijtimoiy soha obyektlarining optik tolali aloqa tarmoqlariga ulanish darajasi tahlil qilindi.
“Mahalla yettiligi” tomonidan bildirilgan taklif va murojaatlar asosida hududda aloqa sifatini oshirish, yuqori tezlikdagi internet tarmog‘ini kengaytirish hamda aniqlangan kamchiliklarni qisqa fursatda bartaraf etish yuzasidan mas’ullarga aniq topshiriqlar yuklatildi.