Xorazm viloyatida noqonuniy qurilmalar keltirib chiqargan radioxalaqitlar bartaraf etildi
2026-09-24 16:10:00 / Yangiliklar
“O‘zkomnazorat” inspeksiyasining Xorazm viloyati hududiy bo‘limi, Elektromagnit moslashuvi xizmati hamda Ichki ishlar boshqarmasi xodimlari hamkorligida radioxalaqit manbalarini aniqlash bo‘yicha navbatdagi radiomonitoring o‘tkazildi.
Tekshiruv davomida Urganch tumanining “Orzu” hamda Xonqa tumanining “Moshto‘g‘ay” mahallalarida yashovchi fuqarolar tomonidan 2 dona mobil aloqa kuchaytirgichi noqonuniy o‘rnatilgani aniqlandi.
Mazkur qurilmalar mobil aloqa operatorlarining yaqin atrofdagi tayanch stansiyalari faoliyatiga kuchli to‘sqinlik qilib, butun hududda mobil aloqa va internet sifatining keskin pasayishiga sabab bo‘lgan. Holat sabab radioxalaqit keltirib chiqargan uskunalar joyida demontaj qilindi. Huquqbuzarlik sodir etgan 2 nafar fuqaroga nisbatan "Ma’muriy javobgarlik to‘g‘risida"gi kodeksning 152-moddasi 1-qismiga asosan ma’muriy chora ko'rildi.
“O‘zkomnazorat” inspeksiyasi telekommunikatsiya tarmoqlariga xalaqit beruvchi va umumiy aloqa sifatini yomonlashtiruvchi noqonuniy vositalardan foydalanish qonunchilikda belgilangan javobgarlikka sabab bo‘lishini eslatib o‘tadi.