Buxoro viloyatida 16 dona ratsiyadan tegishli ruxsatnomasiz foydalanish holati aniqlandi
2026-09-14 13:05:00 / Yangiliklar
Buxoro viloyatida radioelektron vositalardan foydalanish tartibiga rioya etilishi yuzasidan o‘tkazilgan o‘rganish davomida jismoniy shaxs tomonidan tegishli ruxsatnomasiz foydalanib kelinayotgan 16 dona ratsiya qurilmasi aniqlandi.
Mazkur holat “O‘zkomnazorat” inspeksiyasining Buxoro viloyat hududiy bo‘limi, Elektromagnit moslashuv xizmati hamda viloyat Ichki ishlar boshqarmasi hamkorligida Buxoro shahrida o‘tkazilgan tezkor tadbir davomida qayd etildi. Aniqlanishicha, fuqaro M.A. tomonidan “BAOFENG” rusumidagi 16 dona ratsiya qurilmasidan belgilangan tartibda tegishli ruxsatnoma rasmiylashtirmasdan foydalanilgan.
O‘rganish davomida radioelektron vositalar va yuqori chastotali qurilmalardan foydalanishning belgilangan tartiblari, davlat standartlari hamda tasdiqlangan texnik talablarga rioya etilmagani aniqlandi. Mazkur holat yuzasidan fuqaro M.A.ga nisbatan "Ma’muriy javobgarlik to‘g‘risida"gi kodeksning 152-moddasi birinchi qismida nazarda tutilgan “Radioelektron vositalar va yuqori chastotali qurilmalardan foydalanish tartibini buzish” bo‘yicha ma’muriy jazo chorasi qo‘llanildi.
“O‘zkomnazorat” inspeksiyasi jismoniy va yuridik shaxslarni radioelektron vositalardan foydalanishda amaldagi qonunchilik talablariga qat’iy rioya etishga chaqiradi.