Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi “Oʻzkomnazorat”

Toshkent shahrida “Maktabgacha va umumiy o‘rta ta’lim tizimida bolalarning psixologik farovonligi va ruhiy salomatligini ta’minlashda innovatsion xalqaro tajriba va barqaror rivojlanish strategiyalari” mavzusida Respublika ilmiy-amaliy konferensiyasi bo‘lib o‘tdi.

Tadbirda bolalarning psixologik farovonligi va ruhiy salomatligini ta’minlash, xavfsiz va qo‘llab-quvvatlovchi ta’lim muhitini shakllantirish, voyaga yetmaganlar o‘rtasida huquqbuzarlik va bulling holatlarining oldini olish, psixologik xizmatlarni raqamlashtirish, sun’iy intellekt imkoniyatlari hamda bolalarni zararli axborotdan himoya qilish masalalari muhokama qilindi.

Konferensiyada Axborotlashtirish va telekommunikatsiyalar sohasida nazorat inspeksiyasi bo‘lim boshlig‘i N. Xodjaeva “Bolalarni zararli axborotdan himoya qilish: huquqiy asoslar, yoshga oid tasniflash va ekspertiza” mavzusida ma’ruza qildi.
 

“Yoshga oid tasniflash — bu senzura emas. Uning vazifasi axborot mahsulotini bolaning yoshi, ruhiy va ma’naviy rivojlanishi nuqtai nazaridan baholashdir”, — dedi N. Xodjayeva.

Ma’ruzada axborot mahsulotlarini baholashda nafaqat ularning mazmuni, balki qanday shaklda va qanday kontekstda taqdim etilgani, shuningdek, bolaning ruhiyati, dunyoqarashi va xulq-atvoriga ehtimoliy ta’sirini ham hisobga olish zarurligi ta’kidlandi. Tadbir doirasida bolalarning xavfsiz va sog‘lom rivojlanishini ta’minlash, ilg‘or tajribalarni amaliyotga joriy etish hamda tegishli tashkilotlar va mutaxassislar o‘rtasidagi hamkorlikni kuchaytirishga qaratilgan fikr va takliflar bildirildi.