Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi “Oʻzkomnazorat”

“O‘zkomnazorat” inspeksiyasining Navoiy va Buxoro viloyatlari hududiy bo‘limlari tomonidan “Elektromagnit moslashuv xizmati” DUK hamda hududiy Ichki ishlar boshqarmalari bilan hamkorlikda radioelektron vositalardan foydalanish sohasida qonunchilik talablariga rioya etilishi yuzasidan monitoring va nazorat tadbirlari o‘tkazildi.

Tadbirlar davomida Navoiy shahrining “Hayot” MFY hududida fuqaro tomonidan “Baofeng UV-82” rusumidagi 2 dona radioelektron vositadan tegishli ruxsatnomasiz foydalanib kelinayotgani aniqlandi. Mazkur holat yuzasidan belgilangan tartibda ma’muriy bayonnoma rasmiylashtirilib, tegishli choralar ko‘rildi.

Buxoro shahrida o‘tkazilgan nazorat tadbirlarida esa mansabdor shaxs tomonidan 14 dona “SHM S-338” rusumli ratsiya qurilmasidan belgilangan tartibda ruxsatnomasiz foydalanib kelinayotgani aniqlandi. Qurilmalardan noqonuniy foydalanishga chek qo‘yilib, holat yuzasidan ma’muriy bayonnoma rasmiylashtirildi. Mazkur huquqbuzarlik “Ma’muriy javobgarlik to‘g‘risida”gi kodeksning 152-moddasi birinchi qismi talablari asosida ko‘rib chiqish uchun Jinoyat ishlari bo‘yicha Buxoro shahar sudiga yuborildi.

Aniqlangan holatlar radiochastota spektridan foydalanishda belgilangan tartiblarga rioya etish, tegishli ruxsatnomalarni rasmiylashtirish va radioelektron vositalardan qonuniy foydalanish muhimligini ko‘rsatadi. “O‘zkomnazorat” inspeksiyasi tomonidan radiochastota spektridan noqonuniy foydalanish holatlarining oldini olish, qonunchilik talablariga rioya etilishini ta’minlash hamda bu yo‘nalishdagi monitoring va nazorat tadbirlari izchil davom ettiriladi.