Telekommunikatsiya xizmatlari sohasida iste’molchilar murojaatlari muhokama qilindi
2026-08-12 12:15:00 / Yangiliklar
O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasida iste’molchilar murojaatlari bilan ishlash va aholining huquqiy savodxonligini oshirish masalalariga bag‘ishlangan o‘quv-amaliy seminar tashkil etildi.
Seminarda “O‘zkomnazorat” inspeksiyasi xodimlari ishtirok etib, telekommunikatsiya xizmatlari sohasida iste’molchilar huquqlarini himoya qilish, xizmatlar sifatiga qo‘yiladigan talablar hamda ushbu yo‘nalishdagi davlat nazorati masalalari yuzasidan taqdimot o‘tkazdi.
Tadbirda O‘zbekiston Respublikasi Prezidentining 2025-yil 11-dekabrdagi “Telekommunikatsiya xizmatlari ko‘rsatish sohasida iste’molchilar huquqlarini himoya qilishni kuchaytirish chora-tadbirlari to‘g‘risida”gi PQ-371-son qarori bilan Inspeksiyaga yuklatilgan vazifalar, shuningdek, murojaatlarni ko‘rib chiqish bo‘yicha vakolatlar haqida ma’lumot berildi.
Shu bilan birga, Inspeksiyaga 2024-yildan buyon kelib tushgan murojaatlarni ko‘rib chiqish natijalari tahlil qilinib, telekommunikatsiya xizmatlaridan foydalanish jarayonida iste’molchilar tomonidan ko‘tarilayotgan asosiy masalalar va muammoli holatlar yuzasidan tushuntirishlar berildi.
Seminar doirasida murojaatlarda ko‘tarilayotgan masalalarni hamkorlikda o‘rganish, iste’molchilar huquqlarini himoya qilish mexanizmlarini takomillashtirish hamda telekommunikatsiya xizmatlari sifatini oshirish bo‘yicha fikr almashildi.