Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi “Oʻzkomnazorat”

“O‘zkomnazorat” inspeksiyasi xodimlarining axborot-kommunikatsiya texnologiyalari sohasidagi zamonaviy ishlanmalar bilan tanishishi, kasbiy bilim va ko‘nikmalarini oshirish hamda ilg‘or tajribalarni o‘rganish maqsadida Huawei kompaniyasi ofisida taqdimot tashkil etildi.

Tadbir davomida inspeksiya xodimlari, jumladan yosh mutaxassislar, yangi avlod simsiz aloqa texnologiyalari, Wi-Fi 7 va istiqboldagi Wi-Fi 8 standartlari, korporativ tarmoqlarni boshqarish hamda ularning barqaror ishlashini ta’minlashga qaratilgan zamonaviy ishlanmalar bilan tanishdilar. Shuningdek, raqamli infratuzilmani boshqarish va axborot xavfsizligini ta’minlash bo‘yicha qo‘llanilayotgan zamonaviy yondashuvlar haqida ma’lumot berildi.

Taqdimotda davlat tashkilotlari, moliya, transport, neft-gaz va konchilik tarmoqlari uchun mo‘ljallangan zamonaviy AKT texnologiyalari, jumladan aqlli shahar, aqlli kampus, videoanalitika, sun’iy intellekt, ma’lumotlarni uzatish va saqlash tizimlari, videokuzatuv hamda ma’lumotlarni qayta ishlash markazlariga oid ishlanmalar namoyish etildi. Shuningdek, korporativ tarmoqlarni markazlashgan boshqarish, tarmoq infratuzilmasining uzluksiz ishlashini ta’minlash, sun’iy intellekt va bulutli texnologiyalar asosidagi imkoniyatlar haqida ham so‘z yuritildi.

Tadbir davomida zamonaviy AKT yo‘nalishidagi innovatsiyalarni amaliyotga joriy etish, axborot xavfsizligini ta’minlash hamda sohada ilg‘or tajribalarni qo‘llash masalalari yuzasidan o‘zaro fikr almashildi.