“O‘zkomnazorat” inspeksiyasi boshlig‘i Farg‘ona viloyatida sayyor qabul o‘tkazdi
2026-06-25 13:20:00 / Yangiliklar
“O‘zkomnazorat” inspeksiyasi boshlig‘i Farrux Rustamov tomonidan Farg‘ona viloyatida jismoniy va yuridik shaxslar uchun sayyor qabul o‘tkazildi.
Sayyor qabul davomida telekommunikatsiya va pochta aloqasi xizmatlari, mobil aloqa tarmoqlari, axborot xavfsizligi hamda iste’molchilar huquqlarini himoya qilish bilan bog‘liq masalalar yuzasidan fuqarolar murojaatlari ko‘rib chiqildi. Bildirilgan murojaatlar yuzasidan tegishli tushuntirishlar berildi, ayrim masalalar joyida hal etildi, qo‘shimcha o‘rganishni talab etadigan murojaatlar esa nazoratga olindi.
Shuningdek, fuqarolarga Inspeksiyada korrupsiyaga qarshi kurashish yo‘nalishida amalga oshirilayotgan ishlar haqida ma’lumot berildi. Inspeksiya xodimlarining noqonuniy xatti-harakatlari yoki korrupsiyaga oid holatlar yuzasidan ishonch telefonlari orqali xabar berish mumkinligi hamda murojaat qiluvchilarning shaxsiga doir ma’lumotlar sir saqlanishi tushuntirildi.
Shundan so‘ng, Inspeksiya boshlig‘i telekommunikatsiya va aloqa sohasida faoliyat yuritayotgan korxona va tashkilotlar rahbarlari bilan uchrashdi. Unda xizmatlar sifatini oshirish, mavjud muammolarni bartaraf etish, murojaatlar bilan ishlash samaradorligini kuchaytirish hamda davlat nazorati natijadorligini yanada oshirish masalalari muhokama qilinib, tegishli vazifalar belgilandi.
Sayyor qabul davomida ko‘tarilgan masalalarning ijrosi belgilangan tartibda nazoratga olindi.