"O‘zkomnazorat" inspeksiyasida “Yoshlar kuni” doirasida volontyorlik madaniyatiga bag‘ishlangan davra suhbati o‘tkazildi
2026-06-19 13:15:00 / Yangiliklar
"O‘zkomnazorat" inspeksiyasida “Yoshlar kuni” munosabati bilan volontyorlik madaniyatini targ‘ib etish va ijtimoiy faollikni oshirish maqsadida “Volontyorlik madaniyatini shakllantirish” mavzusida davra suhbati tashkil etildi.
Tadbirda Yoshlar ishlari agentligi direktorining maslahatchisi va O‘zbekiston Volontyorlar assotsiatsiyasi rahbari Shirin Abidova Rahimjanovna, shuningdek, BMT Volontyorlari dasturining O‘zbekistondagi koordinatori Mirsaid Uzakov Muzaffarovich ishtirok etdi.
Muloqot davomida volontyorlik faoliyatining mazmun-mohiyati, uning jamiyat taraqqiyotidagi o‘rni, BMT Volontyorlari dasturi faoliyati hamda mamlakatimizda volontyorlik harakatining rivojlanishi haqida so‘z yuritildi.
Shuningdek, volontyorlik faoliyati shaxsiy rivojlanish, yangi tajriba orttirish, yetakchilik va jamoada ishlash ko‘nikmalarini shakllantirishda muhim omil ekani ta’kidlandi. Ochiq muloqot tarzida o‘tgan tadbir davomida ishtirokchilar volontyorlik sohasidagi imkoniyatlar va istiqbollar yuzasidan fikr almashib, o‘zlarini qiziqtirgan savollarga javob oldilar.