Xorazm viloyatida qurilish sohasidagi zamonaviy raqamli nazorat va onlayn monitoring tizimlari faoliyati o‘rganildi
2026-05-20 16:00:00 / Yangiliklar
“O‘zkomnazorat” inspeksiyasi boshlig‘i F. Rustamov Xorazm viloyatida Qurilish va uy-joy kommunal xo'jaligi nazorati inspeksiyasi hududiy boshqarmasi huzurida tashkil etilgan “Onlayn kuzatuv markazi” faoliyati hamda qurilish sohasida joriy etilgan raqamli nazorat tizimlari bilan tanishdi.
Tashrif davomida qurilish jarayonlarini masofadan monitoring qilish hamda zamonaviy axborot-kommunikatsiya texnologiyalari asosida yo‘lga qo‘yilgan raqamli nazorat mexanizmlarining samaradorligi ko‘zdan kechirildi.
Ta’kidlanishicha, amaliyotga tatbiq etilgan raqamli tizimlar orqali har bir qurilayotgan obyekt bo‘yicha shaharsozlik hujjatlari, qurilish muddati, loyiha hujjatlari va ekspertiza xulosalari haqidagi ma’lumotlarni onlayn olish imkoniyati yaratilgan. Bu esa qurilish jarayonlarida shaffoflikni ta’minlash va davlat nazoratini kuchaytirishga xizmat qilmoqda.
Shuningdek, markazda qurilish obyektlarini real vaqt rejimida kuzatish, mobil videokameralar (bodikamera) va maxsus planshetlar orqali nazorat qilish tizimlari yo‘lga qo‘yilgan bo‘lib, bu jarayonlar qurilish sifati va intizomini oshirish, qonunbuzilishlarning oldini olishda muhim ahamiyat kasb etmoqda.
Tashrif davomida telekommunikatsiya infratuzilmasini rivojlantirish hamda idoralararo hamkorlikni yanada kengaytirish masalalari muhokama qilindi. Mazkur jarayonlar qurilish sohasida raqamli texnologiyalarni keng joriy etish, davlat nazoratini samarali tashkil etish hamda zamonaviy monitoring tizimlarini rivojlantirish yo‘lidagi muhim amaliy qadam sifatida qayd etildi.