Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi “Oʻzkomnazorat”

“O‘zkomnazorat” inspeksiyasi boshlig‘i Qoraqalpog‘iston Respublikasi Taxiatosh tumanida “Link Wise” MChJ xorijiy korxonasi tomonidan barpo etilayotgan Modulli intellektual hisoblash markazi qurilishi bilan tanishdi.

Tashrif davomida qurilish maydonida olib borilayotgan ishlar, markaz uchun yaratilayotgan muhandislik-kommunikatsiya infratuzilmasi hamda joriy etilayotgan zamonaviy texnologiyalar ko‘zdan kechirildi.

Mutaxassislar markazning texnik imkoniyatlari haqida ma’lumot berib, ushbu majmuaga yuqori unumdor server uskunalari o‘rnatilishi, katta hajmdagi ma’lumotlarni tezkor qayta ishlash va ishonchli saqlash imkoniyatlari yaratilishini ta’kidladi. Shuningdek, loyiha sun’iy intellekt texnologiyalarini rivojlantirishga yo‘naltirilgani qayd etildi.

Loyiha doirasida uzluksiz elektr ta’minoti, energiya samaradorligi, zamonaviy sovitish tizimlari va axborot xavfsizligini ta’minlashga alohida e’tibor qaratilmoqda. Buning natijasida markaz barqaror va xavfsiz ishlashi uchun zarur sharoitlar yaratiladi.

Mazkur markaz ishga tushirilgach, hududda raqamli infratuzilma yanada mustahkamlanib, davlat tashkilotlari va biznes uchun yangi imkoniyatlar paydo bo‘lishi, shuningdek, yangi ish o‘rinlari yaratilishi kutilmoqda.