Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi “Oʻzkomnazorat”

Raqamli texnologiyalar vazirligi huzuridagi Axborotlashtirish va telekommunikatsiyalar sohasida nazorat inspeksiyasi, ya’ni “O‘zkomnazorat” inspeksiyasi tomonidan 2026-yil I choragida quyidagi ishlar amalga oshirildi:

O‘tgan 3 oy davomida aloqa, axborotlashtirish va telekommunikatsiyalar sohasida qonun hujjatlari hamda davlat standartlari talablariga rioya etilishi yuzasidan 55 ta nazorat tadbiri tashkil etildi.

Nazorat tadbirlarining 16 tasi (29 foizi) davlat va xo‘jalik yurituvchi organlarda, 39 tasi (71 foizi) tadbirkorlik subyektlari faoliyatida o‘tkazildi.

Aniqlangan kamchiliklarni bartaraf etish bo‘yicha 38 ta tashkilotga ko‘rsatma, 2 ta idoraga taqdimnoma kiritildi, 18 nafar mansabdor shaxsga nisbatan ma’muriy choralar qo‘llanildi hamda 4 nafar mas’ul xodimga intizomiy jazo berildi.

Shuningdek, raqamli servis va xizmatlarni ko‘rsatuvchi 112 ta axborot tizimi faoliyati monitoring qilinib, aniqlangan 12 ta kamchilik bartaraf etildi. 44 ta vazirlik va idoralarning 411 ta axborot tizimi qonunchilik hujjatlariga muvofiq ekspertizadan o‘tkazilishi ustidan nazorat tashkil etildi.

Davlat organlarining rasmiy veb-saytlari orqali ko‘rsatilayotgan 441 ta elektron davlat xizmati va 347 ta qo‘shimcha elektron xizmatlar doirasida aniqlangan 21 ta kamchilik bartaraf ettirildi.

Internet tarmog‘ida mualliflik va turdosh huquqlar buzilishi bilan bog‘liq holatlar aniqlangan 197 ta veb-resurs faoliyati amaldagi talablar asosida cheklandi. Noqonuniy axborotlarning tarqatilishi yuzasidan aniqlangan 1 862 ta holat bo‘yicha 230 ta veb-saytdagi huquqbuzarliklar bartaraf etildi.

Murojaatlarni ko‘rib chiqish yo‘nalishida 2026-yilning I choragi davomida Inspeksiya tomonidan 2 224 ta murojaat ko‘rib chiqildi, shundan 1 832 tasi qanoatlantirildi. O‘tgan yilning mos davriga nisbatan murojaatlar soni 767 taga yoki 9,7 foizga kamaydi.

Hisobot davrida jismoniy va yuridik shaxslar vakillari ishtirokida 49 ta sayyor qabul tashkil etildi. Ularda 1 478 nafar aholi vakili ishtirok etib, 175 ta murojaat ko‘rib chiqildi. Murojaatlarning 92 foizi qanoatlantirildi.

Aholiga ko‘rsatilayotgan mobil aloqa xizmatlari sifatiga salbiy ta’sir ko‘rsatayotgan 363 ta noqonuniy foydalanilayotgan qurilma, ya’ni radioelektron vositalar va repiterlar faoliyatiga chek qo‘yildi.

Turizm maskanlari, aeroportlar, temiryo‘l vokzallari, avtovokzallar va boshqa jamoat joylarida tashkil etilgan 950 dan ortiq Wi-Fi hududlarida xizmatlar sifati monitoring qilinib, aniqlangan 44 ta kamchilik bartaraf etildi.

Pochta aloqasini nazorat qilish yo‘nalishida jo‘natilgan xat-xabarlarning belgilangan muddatlarda manziliga yetkazilishi monitoring qilinib, aniqlangan 333 ta kamchilik bo‘yicha ogohlantirishlar berildi hamda kamchiliklarga yo‘l qo‘ygan 17 nafar mas’ul shaxsga nisbatan intizomiy choralar qo‘llanildi.

“O‘zkomnazorat” inspeksiyasining faoliyati aloqa, axborotlashtirish, telekommunikatsiyalar va raqamli texnologiyalar sohasida aholi hamda tadbirkorlik subyektlariga ko‘rsatilayotgan raqamli servis va xizmatlarning uzluksizligi va sifatini ta’minlash, shuningdek, iste’molchilar huquqlarini himoya qilishga qaratib kelinmoqda.