“O‘zkomnazorat” inspeksiyasida xodimlarning korrupsiyaga qarshi kurashish bo‘yicha bilim va ko‘nikmalarini oshirishga qaratilgan seminar tashkil etildi
2026-04-15 16:40:00 / Yangiliklar
“O‘zkomnazorat” inspeksiyasida xodimlarning korrupsiyaga qarshi kurashish sohasidagi bilimlarini oshirishga qaratilgan seminar tashkil etildi. Mazkur tadbir davlat organlari faoliyatida ochiqlik va shaffoflikni ta’minlash, korrupsiyaviy xavf-xatarlarning oldini olish hamda xodimlarning huquqiy savodxonligini oshirishga xizmat qiladi.
Tadbir davomida xodimlarga korrupsiyaga qarshi siyosatning asosiy yo‘nalishlari, manfaatlar to‘qnashuvini aniqlash va boshqarish mexanizmlari, korrupsiyaviy xavf-xatarlarni baholash hamda murojaatlarni ko‘rib chiqish tartiblari yuzasidan batafsil tushuntirishlar berildi.
Shuningdek, xodimlarni tizimli ravishda o‘qitish, xizmat tekshiruvlarini o‘tkazish, korrupsiyaga qarshi tartib-taomillar samaradorligini monitoring qilish va ichki nazorat mexanizmlarini takomillashtirish masalalariga alohida e’tibor qaratildi.
Ta’kidlanganidek, bunday seminarlar xodimlarda korrupsiyaga nisbatan murosasiz munosabatni shakllantirish, xizmat faoliyatida qonuniylikni ta’minlash hamda davlat organlariga bo‘lgan ishonchni yanada mustahkamlashda muhim ahamiyat kasb etadi.