“O‘zbekiston — 2030” strategiyasi va davlat dasturi yo‘nalishlari bo‘yicha seminar tashkil etildi
2026-04-06 18:05:00 / Yangiliklar
Joriy yilning 6-aprel kuni “O‘zkomnazorat” inspeksiyasi xodimlari uchun “O‘zbekiston — 2030” strategiyasi va mahallalarni rivojlantirish bo‘yicha davlat dasturining mazmuni va maqsadlarini tushuntirishga bag‘ishlangan seminar o‘tkazildi.
Tadbirda xodimlarga Prezidentning 2026-yil 16-fevraldagi “Mamlakat taraqqiyotining 2030-yilgacha moʻljallangan ustuvor yoʻnalishlari doirasida islohotlarni izchil davom ettirish va yangi bosqichga olib chiqishning qoʻshimcha chora-tadbirlari toʻgʻrisida”gi PF-21-son va “Mahallani rivojlantirish va jamiyatni yuksaltirish” yilida ustuvor yoʻnalishlar boʻyicha islohotlar dasturlari va “Oʻzbekiston – 2030” strategiyasini amalga oshirish boʻyicha davlat dasturi toʻgʻrisida”gi PF-22-sonli farmonlari mazmuni atroflicha tushuntirildi.
Seminar davomida strategiya va dasturlarning asosiy yo‘nalishlari, jumladan har bir fuqaroning salohiyatini ro‘yobga chiqarish, barqaror iqtisodiy o‘sish orqali aholi farovonligini oshirish, mahalla infratuzilmasini rivojlantirish, kasb-hunar ta’limi va mehnat bozorini qo‘llab-quvvatlash masalalari yoritildi.
Shuningdek, strategiya va dastur maqsadlarini raqamli platformalar orqali monitoring qilish, mahalla va jamiyatni rivojlantirish bo‘yicha ustuvor chora-tadbirlar, har bir vazirlik, idora va mahalliy hokimiyat organining shaxsiy mas’uliyati, ijro mexanizmi va nazorat tizimi kabi masalalar atroflicha muhokama qilindi.
Tadbir yakunida xodimlar bilan savol-javoblar o‘tkazilib, ularning bilimlari onlayn testlar orqali baholandi. Seminar xodimlarning kasbiy salohiyatini oshirish va mahalla institutini rivojlantirishga xizmat qildi.