O‘zbekiston Respublikasi Maktabgacha va maktab taʼlimi vazirligi

Bugun poytaxtimizda joylashgan Simpoziumlar saroyida Toshkent shahridagi umumtaʼlim maktablari va maktabgacha taʼlim tashkilotlari rahbarlari va pedagoglari bilan uchrashuv boʻlib oʻtdi.

Unda Maktabgacha va maktab taʼlimi vaziri Hilola Umarova, Toshkent shahar hokimi Shavkat Umurzoqov, poytaxt tumanlari hokimlari, masʼul rahbarlar hamda taʼlim tizimi vakillari ishtirok etdi.

😄 Ochiq muloqot tarzida tashkil etilgan tadbirda bugungi kunda sohada olib borilayotgan islohotlar mazmun-mohiyati, taʼlim sifatini oshirish, tizimni raqamlashtirish, malakali kadrlar bilan taʼminlash borasida olib borilayotgan ishlar haqida soʻz yuritildi.

Qayd etilganidek, ayni vaqtda poytaxtimizda 326 ta umumtaʼlim maktabi mavjud boʻlib, ushbu taʼlim maskanlaridagi 500 ming nafarga yaqin oʻquvchilarga 25 ming nafardan ortiq pedagog-oʻqituvchilar taʼlim-tarbiya berib kelmoqda.

Shuningdek, 499 ta davlat, 431 ta nodavlat, 10 ta davlat-xususiy sheriklik asosidagi, 107 ta oilaviy, umumiy hisobda 1 047 ta maktabgacha taʼlim tashkilotlarida 160 ming nafardan ortiq  tarbiyalanuvchi bor.

2024-yilda poytaxtdagi 25 ta umumtaʼlim maktabida qurilish-taʼmirlash (2 ta maktabda yangi qurilish, 18 tasida rekonstruksiya, 5 tasida mukammal taʼmirlash) ishlari olib borilishi natijasida 17 115 nafar yangi oʻquvchi oʻrni tashkil qilindi. 16 ta maktabgacha taʼlim tashkilotida olib borilgan qurilish-taʼmirlash ishlari natijasida 2 340 nafar bolaning maktabgacha taʼlimga qamrab olish imkoniyati yaratildi.

✅ Xorijdan jalb qilingan til egalari tajribasidan samarali foydalanish natijasida umumtaʼlim maktablarida fanni bilish darajasi boʻyicha milliy yoki xalqaro sertifikatga ega oʻqituvchilar ulushi 67,5 foizga, oʻquvchilar ulushi esa 15,9 foizga koʻtarildi.

Tanqidiy ruhda davom etgan uchrashuvda poytaxtimizdagi umumtaʼlim maktablarida toʻliq joriy etilayotgan yangi baholash tizimini tashkil etishga doir muhim masalalar tilga olib oʻtildi. 

➖Aytilganidek,  bu jarayon yagona standart va mezonlar asosida amalga oshirilayotganligi sababli oʻquvchilarning bilim koʻrsatkichi 6 foizga (46 dan 53 foizga) oʻsishiga erishildi. Shu maqsadda kelgusi oʻquv yilidan boshlab yangi baholash tizimi joriy etilgan maktablar sonini ikki baravarga oshirish belgilanganligi qayd etildi (hozirda 1500 ta maktabda joriy etilgan). 

Uchrashuvda taʼlim muassasalari infratuzilmasi, davlat xususiy sherikchilik asosidagi nodavlat taʼlim tashkilotlari faoliyati hamda inklyuziv taʼlimni yanada rivojlantirish, maktabgacha taʼlim tashkilotlarida sogʻlom ovqatlantirish tartibini takomillashtirish boʻyicha navbatdagi masalalar atroflicha muhokama qilindi. 

➖Shuningdek, maktab direktorlari va maktabgacha taʼlim tashkilotlari rahbarlarining ushbu masalalarga doir takliflari tinglandi. Belgilangan masalalar boʻyicha tegishli masʼul rahbarlarga zarur koʻrsatma va topshiriqlar berildi.

Tadbir davomida Toshkent shahar maktabgacha va maktab taʼlimi boshqarmasi hamda tegishli tumanlar maktabgacha va maktab taʼlimi boʻlimlari boshligʻi lavozimiga tayinlangan yangi rahbarlar ishtirokchilarga tanishtirildi.