Telekommunikatsiyalarni tartibga solish agentligi va TATU o‘rtasida hamkorlik memorandumi imzolandi.
2026-09-23 15:00:00 / Yangiliklar
CAEx binosida bo‘lib o‘tayotgan ICTWEEK Uzbekistan 2026 xalqaro axborot-kommunikatsiya texnologiyalari haftaligi doirasida Telekommunikatsiyalarni tartibga solish agentligi va Muhammad al-Xorazmiy nomidagi Toshkent axborot texnologiyalari universiteti (TATU) o‘rtasida hamkorlik memorandumi imzolandi.
Mazkur memorandum telekommunikatsiyalar va axborot texnologiyalari sohasida ilmiy-amaliy hamkorlikni rivojlantirish, zamonaviy yondashuvlarni joriy etish hamda soha mutaxassislarining malakasini oshirishga qaratilgan.
Hamkorlik doirasida quyidagi yo‘nalishlarga alohida e’tibor qaratiladi:
🟢telekommunikatsiya, IT va mobil texnologiyalar xizmatlari sifatini baholash hamda telekommunikatsiya tarmoqlarini monitoring qilish;
🟢xizmatlar sifati, qamrov darajasi, uzluksizlik, barqarorlik, tezlik, kechikish, signal darajasi va boshqa muhim ko‘rsatkichlarni o‘lchash metodikalarini takomillashtirish;
🟢o‘zaro tajriba almashish, shuningdek, xodimlar, professor-o‘qituvchilar va soha mutaxassislari ishtirokida seminarlar, konferensiyalar, davra suhbatlari, treninglar, stajirovkalar hamda malaka oshirish tadbirlarini tashkil etish.
Mazkur hamkorlik telekommunikatsiya xizmatlari sifatini yanada oshirish, sohada zamonaviy monitoring va baholash mexanizmlarini rivojlantirish, shuningdek, ta’lim va amaliyot integratsiyasini kuchaytirishga xizmat qiladi.