XODIMLARNING JAHON SAVDO TASHKILOTI HAQIDAGI BILIMLARI OSHIRILDI
2024-10-18 16:20:00 / Yangiliklar
Bugun Suv xo‘jaligi vazirligida xodimlarning Jahon savdo tashkiloti tamoyillari va majburiyatlari haqida bilimini oshirishga qaratilgan seminar o‘tkazildi.
Unda Adliya vazirligining Milliy qonunchilikni JST bitimlariga uyg‘unlashtirish boshqarmasi bosh maslahatchisi Iskandar Gendjaev, Iqtisodiyot va moliya vazirligining Suv xo‘jaligini moliyalashtirish boshqarmasi boshlig‘i Shuhrat Abdumadjidov, Investitsiyalar, sanoat va savdo vazirligining JST boshqarmasi boshlig‘i Mirsoliq Mirahmedov o‘z taqdimotlari bilan ishtirok etib, kelib tushgan savollarga javob qaytardi.
Ta’kidlandiki, JST tovarlar, xizmatlar va intellektual mulk ob’ektlari xalqaro savdosi sohasida “kamsitmaslik” tamoyili ustuvorligini ta’minlashga qaratilgan tashkilot hisoblanadi. Ushbu tamoyil asosida a’zo davlatlar tomonidan o‘z savdo hamkorlari, shuningdek, xorijiy va mahalliy ishlab chiqaruvchi, xizmat ko‘rsatuvchilar orasida kamsitishga yo‘l qo‘yilmasligi ta’minlanadi.
Natijada JSTga a’zo har bir davlat xalqaro savdoning teng huquqli sub’ekti sifatida boshqa a’zolar bilan bir xil imkoniyatlar asosida tashqi iqtisodiy va savdo munosabatlarini olib boradi.
Seminarda JSTning tamoyillari va majburiyatlari to‘g‘risida aytib o‘tildi. O‘zbekistonning JSTga a’zo bo‘lishi bilan bog‘liq huquqiy majburiyatlar va milliy qonunchilikka kiritilayotgan o‘zgarishlar haqida ma’lumot berildi. Xususan, JSTga a’zo bo‘lishning suv xo‘jaligi sohasiga bo‘ladigan ta’siri, xorijiy investitsiyalarni jalb qilish imkoniyatlari va moliyalashtirish masalalariga ham e’tibor qaratildi.
Axborot xizmati