O'zbekiston 90-90-90 va Stop TB maqsadlariga erishish sari bormoqda
2024-09-19 17:15:00 / Yangiliklar
Global jamg'armaning grantlarni boshqarish bo'limi boshlig'i Mark Edington boshchiligidagi delegasiyani sog'liqni saqlash vazirining birinchi o'rinbosari vazifasini bajaruvchi Davron Sultanov qabul qildi.
Maqsad — jamg'armaning O'zbekistonda sog'liqni saqlash sohasidagi joriy va istiqboldagi grant dasturlarini muhokama qilish.
Ma'lumot uchun, Global jamg'arma dunyoda OITS, sil va bezgakning oldini olish, bemorlarni davolash va parvarish qilish bo'yicha dasturlarning eng yirik moliyalashtiruvchisi hisoblanadi. Jamg'arma O'zbekistonda o'z faoliyatini 2006 yilda boshlagan. Tegishli huquqiy xujjatga ko'ra, uning grant mablag'laridan samarali foydalanish chora-tadbirlari belgilab berilgan.
Uchrashuvda tomonlar yurtimizda 2021 – 2024 yillar davomida "O'zbekiston Respublikasida aholining eng zaif qatlamlariga alohida e'tibor qaratgan holda 90-90-90 va Stop TB maqsadlariga erishish bo'yicha faoliyatni kuchaytirish" nomli grant doirasida sil va OITSga qarshi kurashish borasida qator yutuqlarga erishilgani haqida aytib o'tdi.
Jumladan, ftiziatriya tizimi tubdan takomillashtirildi: barcha birlamchi tibbiyot muassasalarida DOTS burchaklari tashkil etildi, JSST tavsiyalariga muvofiq silning dori vositalariga sezgir va chidamli shakllarini aniqlash va davolashning zamonaviy standartlari joriy etildi. Sil tashxisi uchun zamonaviy laboratoriya uskunalari va reagentlar keltirildi. Sun'iy intellektga ega zamonaviy mobil va stasionar rentgen apparatlari olib kelindi.
Silga qarshi laboratoriyalarda bioxavfsizlik ta'minlandi. Yagona elektron ma'lumotlar bazasi joriy etilib, barcha ftiziatriya muassasalari kompyuter texnikasi bilan ta'minlandi. Yuqori malakali kadrlar tayyorlandi. Tuberkulez kasalligi bilan og'rigan bemorlarni video-kuzatuv orqali davolashni amalga oshirish tatbiq etildi.
Bundan tashqari, 52 ming nafardan ortiq OIV infektsiyasi yuqish xavfi yuqori bo'lgan guruhlar vakillari profilaktik tadbirlar bilan qamrab olindi, OIV bilan yashovchi shaxslar retrovirusga qarshi dori vositalari bilan ta'minlandi. 15 ta hududiy OITSga qarshi kurashish markazlari yuqori texnologik asbob-uskunalar bilan jihozlandi.
Mamlakatda aholining ijtimoiy himoyaga muhtoj qatlamlari o'rtasida OIV va sil kasalliklarining oldini olish, davolashning yangi usullari va samarali dori vositalaridan foydalanish muvaffaqiyatli targ'ib qilinmoqda.
Shuningdek, uchrashuvda loyihaning yangi davrini moliyalashtirish masalasi muhokama qilindi. U 2025 – 2027 yillarni qamrab olishi rejalashtirilgan.
Sog'liqni saqlash vazirligi
Matbuot xizmati.