2026-yilning 1-yanvaridan chiqindi xizmatlari uchun toʻlovlarni uyma-uy yurib undirish toʻxtatiladi
2025-11-01 10:00:00 / Yangiliklar
Hurmatli fuqarolar, Chiqindilarni boshqarish va sirkulyar iqtisodiyotni rivojlantirish agentligi Oʻzbekistonda 2026-yil 1-yanvardan boshlab chiqindi xizmatlari uchun toʻlovlar jismoniy va yuridik shaxslar tomonidan faqat onlayn tarzda barcha elektron toʻlov tizimlari orqali amalga oshirilishini maʼlum qiladi.
Bu kabi chora-tadbirlar sohada aholiga qulay to‘lov tizimini yaratish, billing hisoblarini yuritishda shaffoflikni ta’minlash va korrupsion holatlarning oldini olish maqsadida amalga oshirilmoqda.
Bu borada Agentlik tomonidan Qoraqalpogʻiston Respublikasi, viloyatlar hamda Toshkent shahridagi barcha sanitar tozalash korxonalariga tegishli koʻrsatma berilgan.
Maʼlumot uchun: Oʻzbekiston Respublikasining 2025-yil 7-martdagi 1044-sonli Qonuniga koʻra, qattiq maishiy chiqindilarni toʻplash va olib chiqish xizmatlari uchun majburiy toʻlovlar boʻyicha qarzdorligi mavjud boʻlgan isteʼmolchilar qisqa xabarnoma (SMS) orqali xabardor qilinganidan keyin mazkur qarzdorlik bartaraf etilguniga qadar ulardan elektr energiyasi uchun toʻlovlarni qabul qilishni vaqtinchalik cheklash belgilangan.
Shu oʻrinda, bu kabi chora-tadbirlar Prezidentning 2024-yil 4-yanvardagi 5-sonli hamda 2025-yil 24-martdagi 56-sonli farmonlariga muvofiq respublikada maishiy chiqindilarni olib chiqib ketish xizmati uchun jismoniy va yuridik shaxslardan toʻlovlarni qabul qilish va abonentlar hisobini yuritishni faqatgina:
- Agentlikning “Toza makon” billing tizimi;
- elektron toʻlov tizimlari;
- yoki internet aloqasi bilan taʼminlanmagan, hudud markazidan olis masofada joylashgan aholi yashash punktlari uchun istisno tariqasida tijorat banklari kassalari, “Oʻzbekiston pochtasi” AJ pochta boʻlimlari orqali amalga oshirilishi koʻrsatilgan.
Bundan tashqari, Vazirlar Mahkamasining 2025-yil 16-oktabrdagi 648-sonli qaroriga koʻra, qattiq maishiy chiqindilarni toʻplash va olib chiqib ketish boʻyicha jismoniy va yuridik shaxslarga koʻrsatilgan xizmatlar uchun undirilgan toʻlovlar hisobidan sanitar tozalash korxonalari, chiqindilarni qayta yuklash punktlari, chiqindi poligonlari, chiqindilarni yoqish zavodlari hamda ekosanoat zonalarida faoliyat yurituvchi tadbirkorlik subyektlariga haq toʻlash tartibi toʻgʻrisida Nizomga asosan amalga oshiriladi.