Oʻzbekiston va Finlyandiya hamkorligida chiqindilarni qayta ishlash boʻyicha “Green Zone” sanoat markazi barpo etiladi
2025-10-31 20:00:00 / Yangiliklar
Тoshkent shahrida 31-oktabr kuni Finlyandiya Prezidenti Aleksandr Stubning Oʻzbekistonga rasmiy tashrifi doirasida “Oʻzbekiston – Finlyandiya” biznes forumi boʻlib oʻtdi.
Oʻzbekiston Respublikasi Prezidenti Shavkat Mirziyoyev va Finlyandiya Respublikasi Prezidenti Aleksandr Stubb oʻrtasida boʻlib oʻtgan muzokaralar yakunida turli yoʻnalishlarda Qoʻshma bayonot imzolandi.
Shu jumladan, Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Finlyandiyaning “EPSE Oy” kompaniyasi oʻrtasida hamkorlik memorandumi imzolandi.
Anglashuv memorandumida “Oʻzbekiston Respublikasida chiqindilarni qayta ishlash boʻyicha “Green Zone” sanoat markazini barpo etish sohasida hamkorlik qilish toʻgʻrisida”gi qator chora-tadbirlar nazarda tutilgan.
Xususan, unga koʻra:
- respublikada chiqindilarni utilizatsiya qilish va ularning qiymatini oshirish texnologiyalarini ishlab chiqish hamda joriy etish sohasini rivojlantirish;
- chiqindilarni iqtisodiyotning muhim boʻlagiga aylantirishga qaratilgan sanoat obyektlari va innovatsion maydonchalarni yaratish;
- tomonlar ishtirokidagi ilgʻor texnologiyalar, bilim va kompetensiyalarga asoslangan oʻzaro manfaatli hamkorlik shakllarini oʻrganish hamda amalga oshirish masalalariga alohida ahamiyat qaratilgan.