Chiqindilarni boshqarish sohasida raqamlashtirishning ahamiyati yuzasidan seminar o‘tkazildi
2025-10-16 08:20:00 / Yangiliklar
O‘zbekiston Respublikasi Bosh Prokuraturasi hamda Ekologiya, atrof-muhitni muhofaza qilish va iqlim o‘zgarishi vazirligi, Chiqindilarni boshqarish va sirkulyar iqtisodiyotni rivojlantirish agentligi, Yoshlar ishlari agentligi hamkorligida "Chiqindilar bilan ishlash sohasini raqamlashtirish va aholiga xizmat ko‘rsatish sifatini oshirish" mavzusida Toshkent shahrida o‘quv-amaliy seminar tashkil etildi.
Unda Qoraqalpog‘iston Respublikasi va viloyatlar prokurorlarining o‘rinbosarlari, bo‘lim boshliqlari, hokimliklar va hududiy Chiqindilarni boshqarish boshqarmalari boshliqlari hamda sanitar tozalash korxonalari vakillari, eko-faollar ishtirok etdi.
Seminar doirasida ishtirokchilar Ekologiya, atrof-muhitni muhofaza qilish va iqlim o‘zgarishi vazirligida ham bo‘lib, Chiqindilarni boshqarish va sirkulyar iqtisodiyotni rivojlantirish agentligi tomonidan chiqindilarni boshqarish sohasidagi billing va GPS tizimining zamonaviy axborot texnologiyalari orqali raqamlashtirilgani bo‘yicha olib borilgan ishlar bilan tanishishdi.
Jarayonda Ekologiya vaziri Aziz Abduhakimov yagona billing tizimi yaratilgani natijasida sohada ko‘p bosqichli byurokratik jarayonlar qisqarib, xizmat ko‘rsatish sifati va nazorat tizimi samaradorligi oshishiga erishilganini taʼkidladi.
Shuningdek, Chiqindilarni boshqarish agentligi direktori Sharifbek Hasanov “Toza makon” billing yagona elektron tizimida yaratilgan qulayliklarni birma-bir tanishtirilib, qo‘shimcha integratsiya jarayonlari haqida maʼlumot berdi.
Jumladan, ushbu tizimda yuritilayotgan sanitar tozalash korxonalari, ularning xizmat ko‘rsatish hududlari va geografik chegaralari, abonentlar haqidagi maʼlumotlar, chiqindi yig‘ish maydonchalari joylashuvi, shuningdek, xizmat sifati bo‘yicha onlayn murojaatlar qabul qilinishi kabi afzalliklari tushuntirib berildi.
Yig‘ilganlar “Toza makon” billing tizimi — sohada xizmat ko‘rsatish sifati va samaradorligini oshirish, aholiga qulaylik yaratish hamda barcha jarayonlarda maʼlumotlar shaffofligini taʼminlashga xizmat qilishiga amin bo‘lishdi.
Xususan, tizimda:
- Elektr energiyasi;
- Ichki ishlar vazirligining manzil axborot tizimi;
- Yagona identifikatsiya tizimi (OneID);
- Soliq tizimi;
- Ko‘chmas mulk reyestri;
- Elektron to‘lov tizimlari (Payme, Chlichk, Paynet, Upay va boshqalar);
- SMS xabarnoma tizimi;
- Notarial tizim;
- Markaziy bankning Munis tizimi;
- GPS monitoring tizimi;
- Pasport maʼlumotlari kabi manfaatdor idoralar axborot tizimlari biriktirilgan.
Maʼlumot uchun: Hozirda sanitar tozalash xizmatlarida ushbu tizim orqali respublika bo‘yicha 7,1 million abonent, 23,9 million aholi, 8 301 ta mahalla va 715 ming yuridik shaxs qamrab olingan.
Shu kuni amaliy seminar ishtirokchilari chiqindilarni qayta yuklash punkti hamda zamonaviy maishiy chiqindi poligoni faoliyati bilan ham yaqindan tanishtirildi.