Chiqindilarni boshqarish va sirkulyar iqtisodiyotni rivojlantirish agentligi

Bugun, 14-oktabr kuni Prezident Shavkat Mirziyoyev raisligida mahalla tizimini yana-da takomillashtirish va joylarda ishlarni samarali tashkil etish masalalari yuzasidan videoselektor yig‘ilishi bo‘lib o‘tdi. Unda keyingi yillarda amalga oshirilgan mahalla institutini isloh qilish va uni xalq hayotiga yaqin, samarali tizimga aylantirish bo‘yicha keng ko‘lamli ishlar va istiqbolli rejalar muhokama qilindi.

Jumladan, hududlar tozaligiga ham alohida eʼtibor qaratilib, mahallaning ozodaligi shu yerda yashayotgan aholi, “mahalla yettiligi”, hokimning “yuzi” ekanligi taʼkidlandi. Shunday bo‘lsa-da, ayrim mahallalar, ko‘chalar, qurilishlar atrofi, ariqlar, xiyobonlarda ozodalik talablariga rioya etilmayotgani ko‘rsatib o‘tildi.

Shu o‘rinda, Davlatimiz rahbari tashabbusi bilan butun respublikada tozalik va ozodalik oyligi eʼlon qilinishi belgilandi. Bu borada har bir tuman va shahar hokimiga, obodonlashtirishga masʼul hokim o‘rinbosarlariga 24 soat ishlaydigan brigadalar tashkil qilib, ko‘cha, xonadon, ko‘p qavatli uy, ijtimoiy obyektlar atrofini tozalash bo‘yicha tegishli topshiriqlar berildi. Bunda “Toza hudud” korxonalariga qarashli maxsus texnikalar ham to‘liq safarbar qilinadi.

Shuningdek, Ichki ishlar vazirligi va Milliy gvardiyaga chiqindi tashlaganlik uchun jarima qo‘llash vakolati berilgani qayd etilib, ularga joylarga chiqib, shahar va tuman markazlarida kunlik nazorat o‘rnatish topshirildi.

Ayni yo‘nalishda belgilangan topshiriqlar ijrosi va hududlarda sanitar tozalash korxonalari ishtirokida tozalik tadbirlarining qizg‘in olib borilishi nazorati yuzasidan Chiqindilarni boshqarish va sirkulyar iqtisodiyotni rivojlantirish agentligida 24/7 rejimdagi respublika ishchi guruhi shtabi tashkil etildi va kunlik chora-tadbirlar hisoboti yuritib borilishi yo‘lga qo‘yildi.

Diqqat! O‘zbekiston Respublikasi Prezidentining 2024-yil 4-yanvardagi 5-son Farmoniga ko‘ra, (https://lex.uz/docs/6732832) hududlarni tozalashga masʼul boʼlgan jismoniy va yuridik shaxslar oʼz vazifalarini bajarmaganligi natijasida atrof-muhitning ifloslanishi uchun javobgarlikka tortiladi. Belgilanmagan joylarga chiqindi tashlash Ma’muriy javobgarlik to‘g‘risidagi Kodeksning tegishli moddalariga ko‘ra qat’iy javobgarlikka sabab bo‘ladi!

Chiqindilarni boshqarish va sirkulyar iqtisodiyotni rivojlantirish agentligi barchani tozalik oyligida faol ishtirok etishga, duch kelgan joyga chiqindi tashlamaslikka, ogohlikka chaqiradi. Chiqindilarni boshqarish sohasiga hamda sanitar tozalash xizmatlariga oid taklif va murojaatlarni Agentlikning "1205" ishonch raqami orqali qoldirishingiz mumkin. 

Sizning murojaatingiz biz uchun muhim!