Samarqandda ilk bor yer osti chiqindi saqlash majmuasi tashkil etildi
2025-09-25 17:00:00 / Yangiliklar
Ma'lumki, mamlakatimizda ekologik barqarorlik, atrof-muhit obodligi, hududlarning sanitar holati yaxshilanishiga alohida e'tibor qaratilmoqda. Xususan, shaharlar markazlarida xalqimiz hamda xorijiy mehmonlarga qulaylik yaratish barobarida aholi gavjum hududlarni yanada obodonlashtirish maqsadida yana bir loyihaga qo‘l urildi.
Chiqindilarni boshqarish va sirkulyar iqtisodiyotni rivojlantirish agentligi tashabbusi bilan Samarqand viloyatida aholidan to‘planadigan maishiy chiqindilarning atrofga sochilib ketmasligi, issiq kunlarda turli noxush hidlar tarqalishining oldini olish va fuqarolarga qulay shart-sharoit yaratish maqsadida Samarqand shahri Qorasuv massivi "Obod maskan" MFYda 2 ta yarim yer osti chiqindi saqlovchi maxsus qutilar majmuasi ishga tushirildi.
Ma'lumot uchun: Mazkur yer osti chiqindi saqlash majmuasi 2 metr chuqurlikda joylashtirilgan bo‘lib, ularning har biriga 2 tadan jami 4 ta maxsus konteyner o‘rnatilgan. Konteynerlarning sig‘imi 3 metr kub ya'ni 550 litrni tashkil etadi. Natijada 1000-1500 nafar aholiga xizmat qiladi. Kelgusida bu kabi yer osti majmuasidan hududda yana 5 ta qurish rejalashtirilgan.
Mahalliy aholi tomonidan bu kabi samarali chora-tadbirlar mamnuniyat bilan qarshilanib, ilgari shamol yoki turli hayvonlar tufayli chiqindilarning yer ustiga sochilib ketilishi kabi holatlarning oldini olishda ma'qul yechim bo‘lgani ta'kidlandi.
Bu kabi chora-tadbirlar O‘zbekiston Respublikasi Prezidentining “Chiqindilarni boshqarish tizimini takomillashtirish va ularning ekologik vaziyatga salbiy taʼsirini kamaytirish bo‘yicha chora-tadbirlar to‘g‘risida”gi 5-son Farmoni talablari ijrosi yuzasidan respublika bo‘yicha izchil davom ettirilmoqda.