Sayyor qabul: Chiqindilarni boshqarish agentligi Samarqandda aholi murojaatlarini o‘rgandi
2025-07-18 13:50:00 / Rahbariyatning bayonotlari va nutqlari
Bugun, 18-iyul kuni Ekologiya vazirligi huzuridagi Chiqindilarni boshqarish va sirkulyar iqtisodiyotni rivojlantirish agentligi direktori Sharifbek Hasanov boshchiligidagi mutasaddilar ishtirokida Samarqand shahri “Bog‘ishamol” mahallasida sayyor qabul tashkil etildi.
Unda agentlik, viloyat Ekologiya va Chiqindilarni boshqarish boshqarmalari, shahar hokimligi, mahallalar hamda sanitar tozalash korxonasi vakillari ishtirok etdi.
Qabul davomida shahar va tumanlar fuqarolari tomonidan bildirilgan muammo va murojaatlar birma-bir ko‘rib chiqildi. Jarayonda 40 ga yaqin jismoniy va yuridik shaxslarning ekologiya, chiqindilarni boshqarish, sanitar tozalash xizmati sifati, debitor qarzdorlik, chiqindi yig‘ish punkti tashkil etish va poligonlar holatiga doir murojaatlari qabul qilindi.
Qabul davomida asosiy eʼtibor murojaatlarning joyida hal etilishiga qaratilib, qo‘shimcha o‘rganish va qonuniy qaror qabul qilish uchun vaqt talab qilganlari ish yurituviga olindi, ya’ni har bir murojaat alohida nazoratda.
Maʼlumot o‘rnida: bu kabi chora-tadbirlar “Jismoniy va yuridik shaxslarning murojaatlari to‘g‘risida”gi qonunga o‘zgartirish va qo‘shimchalar kiritish haqida”gi 445-son O‘zbekiston Respublikasi Qonuni ijrosi yuzasidan olib borilmoqda.