Mustaqillik bayrami arafasida “Dolzarb 40 kunlik” tozalik tadbirlari davom etmoqda
2026-08-06 17:05:00 / Yangiliklar
O‘zbekiston Respublikasi Mustaqilligining 35 yilligi munosabati bilan joriy yilning 28-iyuldan 6-sentabriga qadar respublika bo‘ylab “Dolzarb 40 kunlik” umummilliy tozalik tadbirlari o‘tkazilmoqda.
Mazkur tadbirlar doirasida hududlarda sanitariya-tozalik ishlarini kuchaytirish, aholi yashash maskanlari, ko‘chalar va jamoat joylarini obodonlashtirish, maishiy chiqindilarni o‘z vaqtida olib chiqish hamda noqonuniy chiqindi tashlash holatlarining oldini olish bo‘yicha keng ko‘lamli ishlar amalga oshirilmoqda.
Qoraqalpog‘iston Respublikasida ham sanitariya-tozalik ishlari qat’iy nazoratga olinib, chiqindilarni o‘z vaqtida tozalash va olib chiqish, hududlar ozodaligini ta’minlash bo‘yicha choralar ko‘rilmoqda.
Namangan viloyatida esa tasdiqlangan reja asosida Chiqindilarni boshqarish va sirkulyar iqtisodiyotni rivojlantirish boshqarmasi, “Toza hudud” DM hamda tizim tashkilotlari tomonidan maxsus shtablar tashkil etilgan. Tozalik ishlariga 300 nafardan ortiq xodim va 200 dan ziyod maxsus texnika jalb etilgan. Har kuni shahar va tumanlardan 1410 tonnadan ortiq maishiy chiqindilar olib chiqilmoqda.
Xorazm viloyatida ham “Dolzarb 40 kun” tadbirlari izchil davom etmoqda. Har kuni 200 dan ortiq maxsus texnika yordamida mahallalardan 1100 tonnadan ortiq maishiy chiqindilar olib chiqilmoqda. Shuningdek, 500 nafardan ortiq sanitariya-tozalash korxonalari xodimlari aholi yashash maskanlari, ko‘chalar, jamoat joylari va chiqindi yig‘ish maydonchalarida obodonlashtirish hamda tozalik ishlarini amalga oshirmoqda.
“Dolzarb 40 kunlik” tadbirlari hududlarda ekologik barqarorlikni mustahkamlash, sanitariya holatini yaxshilash va aholi uchun ozoda hamda qulay yashash muhitini yaratishga xizmat qiladi.