Yangiyo‘l tumani maishiy chiqindi poligonida yuzaga kelgan yong‘in bartaraf etildi
2026-05-30 18:15:00 / Yangiliklar
Kuni-kecha Toshkent viloyati, Yangiyo‘l tumani “Iftixor” MFY hududida joylashgan qattiq maishiy chiqindi poligonida tungi soat 01:30 atrofida tabiiy usulda yong‘in sodir bo‘ldi. Мazkur holat yuzasidan Chiqindilarni boshqarish agentligi huzuridagi “Chiqindi poligonlarini boshqarish direksiyasi” DMning Toshkent viloyati hududiy boshqarmasi tomonidan tezkor choralar ko‘rildi. Yong‘inni bartaraf etish hamda uning salbiy oqibatlarini kamaytirish maqsadida 1 dona buldozer, 2 dona yuqori kuchlanishdagi suv nasoslari va 2 dona avtosamosval kabi maxsus texnikalar jalb etilib, to‘liq o‘chirildi. Hozirda poligonda kundalik tekislash va zichlash ishlari amalga oshirilmoqda.
Shu o‘rinda, yong‘inga sabab ob-havoning issiqligi oqibatida poligondagi siniq shisha bo‘laklari lupa vazifasini bajarib, quruq shox-shabba va polietilen paketlarni qizdiradi va qisqa tutab yong‘in sodir bo‘lishiga olib kelishini ma’lum qilamiz.
Ma’lumot uchun: Ushbu poligon 2017-yilda tashkil etilgan bo‘lib, umumiy yer maydoni 37,5 gektardan iborat. Eng yaqin aholi yashash joyigacha 1-1,5 km, eng uzoq qismi bilan 5-6 km, eng baland qismi yerdan 40-45 metr, eng past qismi esa 5-10 metr masofani tashkil etadi. Ayni poligonga kuniga o‘rtacha 1000-1100 tonna chiqindi joylashtiriladi.