Chiqindilarni boshqarish va sirkulyar iqtisodiyotni rivojlantirish agentligi

Aholining muammolarini joyida hal etish ularning qonuniy huquq va manfaatlari himoyasidir. Ayni shu maqsadda Chiqindilarni boshqarish va sirkulyar iqtisodiyotni rivojlantirish agentligi rahbariyati tomonidan sayyor qabullar tizimli ravishda o‘tkazilib kelinmoqda. 

12-fevral kuni Agentlik direktori Sharifbek Hasanov boshchiligidagi respublika ishchi guruhi tomonidan Namangan viloyatining To‘raqo‘rg‘on tumani, “Isvaxon” mahalla fuqarolar yig‘ini “Shodlik” madaniyat markazi binosida navbatdagi ana shunday sayyor qabul tashkil etildi.

Qabul davomida viloyatning turli hududlaridan tashrif buyurgan fuqarolar mutasaddilarga chiqindilarni boshqarish sohasiga doir o‘z murojaatlari, taklif va shikoyatlarini bildirdilar. Ular tomonidan asosan sanitar tozalash xizmati sifati, debitor qarzdorliklar monitoringi, chiqindi yig‘ish punkti tashkil etish, qurilish chiqindilarining olib ketilish tartibi, qayta hisob-kitob va qamrov holatlari bilan bog‘liq masalalar ko‘tarildi.

Mazkur uchrashuvda 50 ga yaqin murojaatlar qabul qilinib, ularning har biri alohida tartibda o‘rganildi. Ayrim masalalar joyida hal etilgan bo‘lsa, batafsil o‘rganish talab etadigan murojaatlar tegishli boshqarmalar va tizim tashkilotlariga yo‘naltirilib hamda ularning ijrosi qat’iy nazoratga olindi.

Maʼlumot o‘rnida: bu kabi chora-tadbirlar “Jismoniy va yuridik shaxslarning murojaatlari to‘g‘risida”gi qonunga o‘zgartirish va qo‘shimchalar kiritish haqida”gi 445-son O‘zbekiston Respublikasi Qonuni hamda “Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi Namunaviy nizomni tasdiqlash haqida”gi 341-son Oʻzbekiston Respublikasi Vazirlar Mahkamasining qarori ijrosi yuzasidan olib borilmoqda.

Tadbirning ikkinchi qismida viloyatning Chust tumani “Angor” mahallasi hududida barpo etilayotgan chiqindilarni yoqish orqali elektr energiyasi olish zavodida olib borilayotgan qurilish ishlari joyida ko‘zdan kechirildi. 

Unda mehnat muhofazasi, xavfsizlik choralarining to‘g‘ri tashkil etilishi o‘rganildi. Tashabbuskor kompaniya vakillari bilan suhbat olib borilib, mavsumiy choralarda xavfsizlik kafolati hamda ishchilar uchun qulay mehnat sharoiti yaratishga ahamiyat qaratish tayinlandi.