Chiqindilarni boshqarish va sirkulyar iqtisodiyotni rivojlantirish agentligi

Jumladan, chiqindilarni qayta ishlash va ulardan energiya manbai olishga asoslangan zamonaviy loyihalarni amalga oshirish boʻyicha Oʻzbekiston Respublikasi Prezidentining tegishli topshirigʻiga muvofiq, Chiqindilarni boshqarish va sirkulyar iqtisodiyotni rivojlantirish agentligi direktori hamda Xitoy Xalq Respublikasining “Wangneng Environment” va “CHSET” etakchi kompaniyalari rahbarlari oʻrtasida chiqindilarni yetkazib berish bitimi imzolangan.

Shu oʻrinda, bugun 2-fevral kuni respublikaning ikki hududida chiqindilarni yoqish orqali elektr energiyasi olishga qaratilgan investitsiya loyihalari qurilishiga tamal toshi qoʻyildi.

Bular:
• Buxoro viloyatida — Xitoy Xalq Respublikasining “Wangneng Environment” kompaniyasi ishtirokida 165 mln AQSH dollari miqdorida toʻgʻridan-toʻgʻri xorijiy investitsiya hisobiga Kogon tumani “Guliston” MFY hududida yiliga 547,5 ming tonna qattiq maishiy chiqindilarni qayta ishlab, natijada 230 mln kVt/soat elektr energiyasi ishlab chiqarish quvvatiga ega boʻlgan zavod quriladi. Loyiha ishga tushirilganda qoʻshimcha 150 ta yangi ish oʻrni yaratiladi.

• Surxondaryo viloyatida — Xitoy Xalq Respublikasining “CHSET” kompaniyasi ishtirokida umumiy qiymati 150 mln AQSH dollari miqdoridagi toʻgʻridan-toʻgʻri xorijiy investitsiya hisobiga Angor tumani “Bahor” MFY hududida yiliga 438 ming tonna qattiq maishiy chiqindilarni qayta ishlab, natijada 75 mln kVt/soat elektr energiyasi ishlab chiqarish quvvatiga ega boʻlgan zavod quriladi. Loyiha ishga tushirilganda qoʻshimcha 150 ta yangi ish oʻrni yaratiladi.

Maʼlumot uchun, ushbu zavodlar 2028-yilda ishga tushirilishi rejalashtirilgan boʻlib, korxonalar 30-yil davomida faoliyat yuritadi.

Jarayonda investorlar, viloyat hokimlari, agentlik rahbariyati, hududiy boshqarmalar hamda jamoatchilik va OAV vakillari ishtirok etishdi.

Tadbirda viloyat hokimi Botir Zaripov, “Wangneng Environment” kompaniyasi boshqaruv kengashi raisi Shan Chao, Chiqindilarni boshqarish va sirkulyar iqtisodiyotni rivojlantirish agentligi direktori Sharifbek Hasanov soʻzga chiqib, loyihaning ahamiyati haqida soʻz yuritishdi. Sharifbek Hasanov ushbu loyiha atrof-muhitni muhofaza qilish, chiqindilarni poligonlarga joylash hajmini kamaytirish, qayta tiklanuvchi energiya manbalaridan foydalanish va ekologik barqarorlikni taʼminlash kabi maqsadlarga xizmat qilishini taʼkidlab oʻtdi.

Bu kabi zavodlar ayni paytda respublikaning 6 ta hududi — Toshkent, Andijon, Namangan, Fargʻona, Qashqadaryo, Samarqand viloyatlarida qurilishi qizgʻin davom etmoqda. Qolaversa, kelgusida Qoraqalpogʻiston Respublikasi va Xorazm viloyatida ham xuddi shunday zavodlar qurilishi rejalashtirilmoqda.

Bir soʻz bilan aytganda bu kabi tashabbuslar chiqindilarni boshqarish tizimini takomillashtirish barobarida “yashil iqtisodiyot” tamoyillariga mos boʻlib, mamlakatimizda ekologik barqarorlikni taʼminlash va sirkulyar iqtisodiyotni va qayta tiklanuvchi energiya manbalarini rivojlantirishga xizmat qiladi.