Savol: Markaziy yo‘llar atrofiga tashlangan chiqindilarni bartaraf etish uchun kim mas’ul?
2026-01-23 17:00:00 / Yangiliklar
— O‘zbekiston Respublikasi Prezidentining “Chiqindilarni boshqarish tizimini takomillashtirish va ularning ekologik vaziyatga salbiy taʼsirini kamaytirish boʻyicha chora-tadbirlar toʻgʻrisida” 2024-yil 4-dekabrdagi PF-5-farmonida Tozalashga masʼul boʻlgan shaxslarning aniq hududlari ro‘yxati belgilab berilgan.
Unga ko‘ra: Obodonlashtirish obyektlari — koʻchalar, aylanma koʻchalar, yoʻllar, markaziy maydonlar, yoʻlaklar, koʻpriklar, tunnellar, yoʻlovchilar oʻtadigan yer osti yoʻllari, favvoralar, ariqlar, kanallar, daryolar, koʻllar va boshqa suv havzalarining qirgʻoqlari, aholining madaniy-maishiy ehtiyojlari va hordiq chiqarishini qondirish uchun foydalaniladigan obyektlar (madaniyat va istirohat bogʻlari, oʻrmon massivlari, bogʻlar, bulvarlar, xiyobonlar), tashqi yoritish, reklama pannolari, yoʻl koʻrsatkichlari, portallar, peshlavhalar, drenaj (drenajning vertikal, yopiq va ochiq gorizontal, yopiq kollektori), irrigatsiya novlari tarmoqlari, tashqi yoritish tarmoqlarini tozalashga hokimliklar, hududiy tuman va shahar obodonlashtirish boshqarmalari mas’ul deb keltirilgan.
Qattiq maishiy chiqindilarni to‘plash va olib chiqib ketish bo‘yicha xizmatlar ko‘rsatuvchi sanitar tozalash korxonalari esa, belgilangan grafik asosida, belgilangan joylardan qattiq maishiy chiqindilarni olib chiqib ketish bilan shugʻullanishi ko‘rsatilgan.
Shunga qaramasdan sanitar tozalash korxonalari tomonidan yurtimiz tozaligiga o‘z hissasini qo‘shish maqsadida grafikdan tashqari vaqtlarda belgilanmagan joylarda to‘plangan chiqindilarni ham olib chiqib ketiladi.
O‘zbekiston Respublikasi Konstitutsiyasi: “Atrof muhitga ehtiyotkorona munosabatda bo‘lish har bir fuqaroning asosiy burchlaridan biridir”.
Shunday ekan hurmatli fuqarolar, ehtiyojingiz natijasida yuzaga kelgan chiqindilarni faqatgina belgilangan joylarga tashlashingizni so’rab, atrof-muhit tozaligiga befarq bo‘lmasligingizni so‘raymiz!